Атыраулық теміржолшы «Құрмет» орденімен марапатталды
Атырау облысы бойынша меншікті тілші
8 наурыз — Халықаралық әйелдер күні қарсаңында «Самұрық-Қазына» АҚ үздік қызметкер әйелдерді ұлықтады, деп хабарлайды Rail-news.kz.
Солардың қатарында «Жолаушылар тасымалы» АҚ «Батыс» аймақтық жолаушылар тасымалы жөніндегі филиалының Атырау телімі билет кассаларының меңгерушісі Ажар Еңсепқызы Ахметова Президент Жарлығымен «Құрмет» орденімен марапатталды.
Атырау облысы Жылыой ауданында дүниеге келген Ажар Еңсепқызы теміржол саласында 36 жылдан бері еңбек етіп келеді.
Еңбек жолын Құлсары қаласындағы теміржол вокзалы кассасында бастап, бүгінде 17 жылдан астам уақыт Атырау теліміндегі билет кассаларының меңгерушісі қызметін абыроймен атқарып келеді.
1990 жылы Гурьев теміржол транспорты техникумын тәмамдаған. Кейін өндірістен қол үзбей жүріп, Атырау инженерлік-гуманитарлық институтында білім алып, автоматтандыру және басқару мамандығы бойынша бакалавр дәрежесін алды.
Отбасында екі баланың анасы, екі немеренің сүйікті әжесі.
Әріптестері Ажар Еңсепқызының еңбегін жоғары бағалап, бұл марапат оның көп жылғы адал қызметінің лайықты жемісі екенін айтады.
«Еңбек жолымда көптеген марапаттар алдым. Бірақ бұл мемлекеттік марапат мен үшін ерекше. Осындай жоғары баға берген мемлекетімізге алғысым шексіз», – дейді Ажар Ахметова.
Теміржол саласына адал еңбек еткен жанның еңбегі әрдайым құрметке лайық!