Парасат биігінде

Құрметті теміржолшы, саламен біте қайнасып, жарты ғасырға жуық ғұмырын арнаған Жұпарбек Сәбитовті кім білмейді?! Еңбек жолын қарапайым жол машинисі болып бастап, ұзақ жылдар теміржолшылар кәсіподағына қызмет етіп, еңбек адамының қамқоршысы және қорғаушысы ретінде танылған жан жетпіс жасқа толып отыр.

Жұпарбек Абзалбекұлы кәсіподаққа келмес бұрын теміржол өндірісінде ширек ғасыр тер төгіп, оның «асүйінде» әбден пісіп жетілді. Алматы теміржол көлігі инженерлері институтын бітіріп, 1980 жылы еңбек жолын ВПО-3000 машинасының машинисі болып бастап, жол шебері, колонна бастығы, Тың темір жолына қарасты Жаңаарқа станциясындағы №245 Жол машинасы стансасының бас инженері қызметтерін атқарды. Жас маманның өз ісіне тыңғылықты, жауапты қасиеті елеусіз қалмай, қызмет сатысында тез өсті. Он шақты жылдан соң Арқалық станциясының бас инженері болып тағайындалды. 1994-1997 жылдары Тың темір жолына қарасты Ақмола бөлімшесінде бас механик, еңбек қорғау бөлімінің бастығы қызметтерін, ал Ақмола екпе ағаштарын қорғау дистанциясында бас инженер лауазымын абыроймен атқарады. Сол жылдары Жұпарбек Абзалбекұлы Мәскеудегі Ресей жол қатынастары академиясында қазандықты қадағалау нысандарына жауапты тұлға ретінде біліктілігін арттырып, білімін көтерді.

Кейіпкеріміздің кәсіподақ саласындағы жұмысы 1997 жылы басталды десе де болады. Ақмола жол кәсіподағында еңбек қорғау жөніндегі өкілетті инспектор болып бастаған еңбек жолы ҚР Теміржолшылар кәсіподағы төрағасының орынбасары лауазымына дейін өсті. Айтуға оңай, бұл жылдар аралығында қаншама маңдай тер төгіліп, жұмыс атқарылып, жүйке жұқарды. Қарапайым еңбек адамын қара жұмыстың қазанында бұрқсарқ қайнап, басынан өткізген адам ғана түсінсе керек. Міне, Жұпарбек Сәбитов өндірістік және қоғамдық қызметтердің сан қырлы сүрлеуінен сүрінбей өтіп, еңбекпен қатар өмірлік мол тәжірибе жинаған жан ретінде қай жерде еңбек дауы туындайды, сол жерде жүрді, машинистер мен жолшылар арасында олардың еңбек құқығын қорғап, талай айтысты, тартысты да, жеңіске де жетті, жеңіліс тапқан тұстар да болды әрине. Сондықтан да оның еңбек адамдары арасындағы беделі биік, мәртебесі жоғары.  

«Жұпарбек Абзалбекұлымен бірге қызмет атқарған жылдары оның алдына қойған мақсат-міндетті шешуде ұстанымы берік принципшіл қасиетін танып білдік. Сала кәсіподағы төрағасының орынбасары қызметінде ұзақ жылдар Ұжымдық келісімшартты жасақтау жұмысын басқарды. Ұлттық компания мен оның еншілес ұйымдарында қауіпсіз еңбек жағдайын құру және жақсарту, еңбекақыны көтеру, жұмысшылар мен олардың балаларының демалысын ұйымдастыру мәселелерін дамыту, сондай-ақ басқа да көптеген өндірістік және әлеуметтік мәселелерді шешуде көп еңбек сіңірді», – дейді кейіпкерімізбен ұзақ уақыт қоян-қолтық еңбек еткен әріптесі Нәзира Серікқызы.  

Бүгінде кәсіподақ төрағасының кеңесшісі ретінде мол тәжірибесімен бөлісіп отырған кейіпкеріміз «Құрметті теміржолшы» белгісінің, «Құрмет» орденінің иегері, басқа да салалық және кәсіподақ марапаттары – көп жылғы ақ-адал еңбектің өтеуі. Жетпісінші көктемін парасат биігінде қарсы алып отырған мерейтой иесіне мықты денсаулық пен ұзақ ғұмыр, отбасы амандығын тілейміз!