Семейлік инженер Мария Тұрсынова «Үздік рационализатор» атанды
Абай облысы бойынша меншікті тілші
Семейлік теміржолшылар рационализаторлық ұсыныстар саны бойынша ұлттық компания көлемінде алдыңғы орындардан көрініп келеді. Өндіріске жаңашылдық енгізуде өңір өнертапқыштарының жетістігі аз емес.
Солардың бірі – Семей магистральдық желі бөлімшесіне қарасты Жаңа-Семей жол дистанциясының инженер-метрологы Мария Тұрсынова. Теміржол саласында 17 жыл еңбек өтілі бар ол – өз саласын мықты меңгерген маман. Соңғы жылдары өндіріске ұтымдылығы жоғары жаңашылдықтар енгізуге ден қойған. Оның зерттеу-зерделеу еңбектерінің бірқатары бүгінде байтақ еліміздегі теміржол саласындағы өндіріс барысына енгізу бойынша қолдау тапқан.
Жалпы, Мария Евгеньевна 2021-2026 жылдары арасында 13 рационализаторлық ұсыныс өткізіпті. Барлығы да Астанадағы техникалық комиссия тарапынан жоғары бағаланған. Мария осыдан біраз бұрын Астана төрінде өткен «Рационализаторлық – техникалық дамудың негізі» атты конференция барысында үздік атанды. 150-ден аса өнертапқыштар арасында Мария Евгеньевна «Үздік рационализатор» атағын жеңіп алып, барша әріптестері арасында мерейі өсті. Ол – жол шаруашылығы бойынша тың өндірістік жаңашылдықтардың авторы. Алдағы уақыттарда да өзі еңбек ететін осы сала бойынша жинаған тәжірибесін, білім-білігін пайдаланып, жоғары сапалы еңбек көрсеткішіне жету жолында тың тәсілдерді ойлап табуға мүдделі.