Мұхаметжан Тынышпаев рухына тағзым

12 мамыр қазақтан шыққан тұңғыш теміржол инженері Мұхаметжан Тынышпаевтың туған күні. Алматыда Алашорда қозғалысы көсемдерінің бірі болған қайраткерді еске алу шарасы өтті. М.Тынышпаев атындағы көлік және коммуникация академиясында өткен шараға қатысушылар Тынышпаев ескерткішіне гүл қойып, рухына тағзым етті. Сонау Америкадан арнайы келген ұлы Дәулет Шейх-Али Тынышпаевпен кездесу өтіп, алаштың арда азаматының өмірі мен өлмес мұрасы жайлы естеліктер айтылды. Тынышпаевтың аты Түрксіб темір жолының құрылысымен қатар аталады. Оның себебі де жоқ емес, қазақ даласына өткен ғасырдың отызыншы жылдары тартылған шойын жол құрылысында оны жобалаушы авторлардың бірі Тынышпаевтың еңбегі ерен. Әуел баста жобаланғандай, Қордай емес Шоқпар вариантын таңдау арқылы ұлы құрылыстың мерзімінен бір жыл ерте бітіп, 25 млн рубль үнемделгені – дәлелденген шындық. Бүгінгі Алматы-1 вокзалының орнын таңдауда да Тынышпаевтың жобасы жүзеге асқан. Бұдан бөлек, Түрксіб – құрылыстың инеженерлік инфрақұрылымдық нысандарын жобалау мен орналастыруда өлшеусіз еңбек сіңірген алаштың арда ұлының халқына қалдырған ескерткіші сынды. «Әкем менің инженер болғанымды қалады, бала кезден анам сәт сайын құлағыма құйып отырған осы аманатты мен орындап шықтым», – дейді мұнай-газ саласында үлкен жетістікке жеткен белгілі ғалым, техника ғылымдарының докторы Дәулет Шейх-Али. Академияда өткен басқосуда Тынышпаевтың бүгінгі ізбасарлары, инженерлік технология саласына еңбегі сіңген бір топ ғалымды марапаттау рәсімі де өтті. – Қазақтың тұңғыш теміржол инженерінің есімін ұлықтау шаралары жалғасып жатыр. Жуырда жаңа документальді фильм түсіру жұмыстары басталды. Биылғы 142 жылдығына орай туған жерінде мұражай, ескерткіш ашылады деп күтілуде. Жасы тоқсанға келген Дәулет ағамыз бүгінде Америкада тұрады, пандемияға қарамастан екі рет вакцинасын алып, осы сапарға ерте көтемнен дайындалып, міне, бүгін ортамызға аман-есен жетіп отыр, туған топырағында әке рухына тағзым етуді өзінің азаматтық борышы санайды, – дейді Тынышпаевтың жиен немересі Нұршакен Жүнісқызы.