Бейнеулік вагон қараушы қауіпті ақау тапты
Маңғыстау облысы бойынша меншікті тілші
Маңғыстаулық вагон қараушылардың қырағы көзінен тыс қалатын ақау жоқ. Жуырда тағы біреуі тіркелді. Қауіпті ақау бұл жолы бейнеулік вагон қараушы Жексенбай Саулеевтің назарына ілікті. 16 маусым күні Бейнеу станциясында бірінші жолға тоқтаған №2769 тақ пойызына техникалық қызмет көрсету кезінде ол, 27 кодты №580 059 76 вагонның букс торабынан ақауды анықтады. Аталған вагон қазақстандық «UNIVERSAL LOGISTIK» жауапкершілігі шектеулі серіктестігіне тиесілі. Деполық жөндеуден 2019 жылдың шілде айында шыққан. Ақтау порты станциясынан Бурабай станциясына бағыт алған бос вагон екен. − Жексенбай Саулеев өзінің міндетін жүзеге асыру барысында букс торабын балғамен тексеріп жатып, дауысы әдеттегіден өзгешелеу шығуына ерекше назар аударады. Букс торабының қақпағын ашып қараса, полиамидті сеператор тұйықтағышы сынған екен. Сыну көлемі 30 миллиметр шамасында. Бұл Жексенбайдың биылғы жылы тапқан бірінші ақауы болса, жалпы бейнеулік вагон қараушылар анықтаған он бесінші жағдай. Бұған дейін көбіне бүйірлік рама, автотіркеме бойынша ақаулықтар кездесетін. Ал мынадай ақаулық пойыз кіріп келген кезде КТСМ құрылғысында да білінбейді, қызу болмайды. Оны тек буксты ұрып көріп, мұқият бақылаудың арқасында байқауға болады, – дейді бұл жөнінде Бейнеу станциясындағы ТҚКП бастығы Нұралы Қыличев.