Рекордсмен вагон қараушы қазіргі уақытта күніне 35 пойызды тексерістен өткізіп жүр
Абай облысы бойынша меншікті тілші
Семей вагон пайдалану депосында ұзақ жылдар бойы еңбек етіп келе жатқан тәжірибелі вагон қараушыларының қалың шоғыры бар. Солардың арасында Болатқали Баймұханбетовты ерекше атап өтуге болады. Болатқали Мұғайыпұлының теміржол саласына келгеніне биыл 20 жылға жуықтапты. Алғашқы еңбек жолын бөлімшеге қарасты Ауыл станциясында бастаған ол бүгінде ұжымдағы аға буын өкіліне айналып отыр. Ауа райы қатаң өңірде вагон қараушылардың жұмысы аса ауыр саналады. Сондықтан бұл жұмысқа тек ерік-жігері мықты, төзімді, нағыз ерлер ғана шыдайды. Болатқали Мұғайыпұлын станция басынан, келіп тоқтаған жүк пойызының жанынан кезіктірдік. Кезекті тексеруді тәмамдап келе жатқан беті екен. Күнқақты, аңызақ жел тотықтырған жүзінен асығыстық байқалады.
– Соңғы апталарда пойыздар саны күрт артып келеді. Кейбір күндері тексеріп әрең үлгереміз. Мына жылжымалы құрам – бүгінгі ауысым бойынша осымен біз қарап шыққан 35-ші пойыз. Бұл соңғы он күндегі ең үлкен көрсеткіш, – дейді ол.
Болатқали Мұғайыпұлы- ның жеткен жетістіктері – бір бөлек әңгіме. Мәселен, вагон арбасының бүйір рамасының ақаулығын табуда бөлімше бойынша жыл рекордын жаңартқан кездері болыпты. Бұл қырағылығы басшылық тарапынан ескеріліп, сәйкесінше мақтау-марапаттар да алған. Ол биылғы жылғы ақаулықтар санының біршама азайғанын жеткізді. Дегенмен, ресейлік вагондардан кінәрат көп тіркеледі екен.
– Негізінен бүйір рамасының ақаулығы көп жағдайда зауыттың кінәсінен орын алады. Күрделілігі сол, анықтауға қиын, көзге ілінбейтін тұстардағы сызат кейіннен жарықшаққа айналып, оның соңы апатқа әкелуі мүмкін. Оған мысал көп, – дейді елу жасқа енді аяқ басқан тәжірибелі вагон қараушы.
Болатқали Мұғайыпұлы әр вагон тексеруші осыған дейін сыр берген бүйір рамаларының нөмірлерін жатқа білу қажет деп санайды. Ал, өзі онлайн өткізіліп жатқан техникалық дәрістерден, инструктаждардан қалған емес. Айтуынша, вагон қараушысы заман ағымына сай өзін үнемі кәсіби тұрғыдан жетілдіріп, үнемі ізденіс үстінде жүруі тиіс. Болатқали Мұғайыпұлы соңғы жылдары вагон қараушылар үшін ұлттық компания басшылығы тарапынан қолайлы жағдай көптеп жасалып жатқанын да айтып өтті. Арнайы киім-кешектер уақытында беріледі. Қызметтік киімнен қағажу жоқ. Вагон қараушылардың «бес қаруы» сай. Сонымен қатар, кейіпкеріміз барша вагон қараушылардың денсаулығы да ұдайы қадағалауда тұрғанын айтады. Ауысымға кірер алдында және шыққан соң міндетті түрде дәрігерлік тексеруден өтеді екен. Мұндай шаралар, сөз жоқ, еңбек процесіне де ықпал етері анық.