Теңізші, һәм, теміржолшы қазіргі уақытта «Тальго» тізгініне ие болып отыр

Саналы ғұмырын тепловоздың оң қанатында өткізген Серікқали Үмбетов осы салада 36 жыл еңбек етіп келеді. Еңбек жолын 18 жасында бастаған машинист тепловоздан басқа жерде өмір бар деп елестеткен де емес... Ақтөбе локомотив пайдалану депосының тәжірибелі машинисі – «Тұлпар-тальго» жүрдек пойызын жүргізу құқығы сеніп тапсырылған санаулы үздіктердің бірі. Ешқашан еңбек қорғау мен қозғалыс, техника қауіпсіздігін бұзған емес. Еңбек жолын 1985 жылы Шұбарқұдық локомотив пайдалану депосында машинист көмекшісі болып бастаған ол теңіз флотында үш жылдық әскери борышын өтеп келген соң Гурьевтегі тепловоз машинистерін дайындау курсынан өтіп, темір тұлпар тізгініне ие болады. «Машинист – үлкен жауапкершілікті талап ететін мамандық. Машинистің ешқашан қателесуге қақысы жоқ. Машинистің алдында ғана емес, желкесінде тағы екі көзі және алтыншысы – түйсігі болады.  Мұның бәрі де тәжірибемен келетін қасиеттер», – дейді Серікқали Үмбетов. Ол 2006 жылы жоғары жауапкершілігі үшін «Қозғалыс қауіпсіздігі үшін» төсбелгісімен марапатталған. Өткен жылы Көлік қызметкерлері күні мерекесіне орай саланың дамуына қосқан үлесі мен адал еңбегі үшін «Қазақстан темір жолы» ҰК» АҚ басқарма төрағасы Мыңбаевтың алғыс хатымен марапатталды. «Әкеге қарап, ұл өсер» деген, бүгінде Серікқали ағаның жалғыз ұлы да әке жолын қуып, теміржол саласына еңбек етіп жүр. Теміржолшының жұбайы – жолдасы мен баласының тілегін тілеуші. «Теміржолшылар – ауызбірлігі мол, қара шаңырақтай үлкен ұжым. Машинистердің жұбайлары оларға күтім мен жағдай жасауы керек. Сондықтан үйге келгенде отағасына толық демалыс сыйлауға тырысамын. Өзі де қауіпсіздік үшін режимді қатты сақтайды. Жалпы отбасымызбен теміржолдың темірдей тәртібімен жүреміз», – дейді жұбайы.