Қауіпсіздікті арттыру – ортақ міндет

ҚТЖ-да теміржолдағы мүліктің қауіпсіздігі және сақталу деңгейін арттыру бойынша 2022-2024 жылдарға арналған Жол картасын жүзеге асыру бойынша дөңгелек үстел өтті.

Басқарма төрағасының орынбасары Қанат Әлмағамбетовтің төрағалығымен өткен жиынға ҚР ІІМ көліктегі полиция департаментінің, ҚР бас көлік прокуратурасының, ҚР көлік министрлігі көлік комитетінің, «Қазақстанның теміржолдағы тармақ иелері қауымдастығы» ЗТБ және «KAZLOGISTICS» көлікшілері одағының өкілдері қатысты.

– Компанияның басым міндеттерінің бірі – қозғалыс қауіпсіздігі талаптарын сақтау, тасымалдау процесі кезінде адам өмірі мен денсаулығына зиян келтіретін тәуекелдерге бармау. Осы мақсаттарды орындау үшін 2022 жылы біз бен көлік полициясы аралығында Жол картасы әзірленген болатын. Содан бері бірлесе біраз жұмыс жүргізілді. Бейнекамера орнату, қоршау салу, бейнетіркегіштер қою сияқты цифрландыру шаралары да жүзеге асырылды, – деді Қ. Әлмағамбетов.  

Теміржолдағы қауіпсіздік мәселесі бойынша баяндама жасаған қозғалыс қауіпсіздігі департаментінің бас менеджері Мұрат Мусин бірлескен жұмыстарға қарамастан келеңсіз оқиғалар әлі де бар екенін жеткізді.  

– Биыл 10 айда 58 адам басу оқиғасы болды, оның 36 жағдайы адам өлімімен аяқталса, 22 оқиғада түрлі деңгейдегі жарақаттар алған. Статистикаға сүйенсек, адам немесе мал басу көбіне перегондарда орын алады. Теміржолды белгіленбеген жерден кесіп өтуге әуес адамдардың әрекеті теміржолшыларға үлкен қиындық туғызуда. Мұндай оқиғалар психологиялық соққы алатын локомотив бригадасының жағдайына да теріс әсер етеді, – деді М. Мусин.  

Теміржол өткелдеріндегі жол-көлік оқиғалары да былтырғыға қарағанда азайған. Көбіне бұл жайттарға да автокөлік жүргізушілерінің өткелден өтерде жол жүру ережесін бұзуы себеп болады. Өткелде ереже бұзу оқиғалары көбіне Алматы, Қостанай, Атырау, Жамбыл жол бөлімшелерінде болған. Апатты жағдайлардың дені күзетілмейтін өткелдерде орын алады екен.  

Жыл басынан бері 584 рет мал басу оқиғасы тіркелген. Оның 245 жағдайы жолаушылар пойызымен болған. Локомотив бригадалары тарапынан 2 мың рет оқыс тежеу берілген. Бүгінгі таңда мал мен жанды басу және өткелдерде жол-көлік оқиғаларын азайту мақсатында профилактикалық жұмыстарға ерекше көңіл бөлінуде. Компания қазіргі таңда «Машинистің ескерту кітабын» автоматтандыру мүмкіндігін қарастыруда.  

Бұдан бөлек жеке тармақ иелері және өндірістік кәсіпорындардың кіреберіс жолдарында жылжымалы құрамның жолдан шығып кету оқиғалары да алаңдаушылық тудырады. Мұндай оқиғалар биыл 192 рет болып, былтырғыдан 9 оқиғаға көбейді. Соның салдарынан 321 вагон мен 46 локомотив бүлінген.  

– Кіреберіс жолдардағы жолдан шығып кету оқиғаларының 70 пайызына жеке тармақ иелеріне қарасты теміржол төсемдерінің сапасыздығы себеп болады. Қалған 30 пайыз жағдайда маневрлік жұмыстардың дұрыс жүргізілмеуі әсер еткен. Көбіне кіреберіс жолдарда вагондардың жолдан шығып кету оқиғалары Қостанай, Қарағанды жол бөлімшелерінде орын алады, – деді баяндамашы.  

Көліктегі полиция департаменті бастығының орынбасары Мадияр Айтуғанов теміржолдағы бейнебақылау жүйелерін жаңғырту мәселесінің маңыздылығына тоқталды. 3 жыл ішінде ҚТЖ 7515 камера қоюды жоспарлап отыр. «Локомотивтердің 15,7 пайызы ғана бейнебақылау жүйесімен қамтамасыз етілген. Қалған бөлігін де бейнекамерамен жабдықтау қажет» деген ол бұл бағыттағы жұмыстарды жеделдету керектігін жеткізді.  

Жиынға қатысқан локомотив, жолаушылар тасымалы бойынша ҚТЖ еншілес ұйымдары басшылары көліктегі полиция қызметкерлерінің сұрақтарына жауап беріп, өз жоспарымен, мәселелердің шешімімен бөлісті. Екі жаққа да ортақ мәселелердің шешімін табуға бағытталған ұсыныстар хаттамаға енгізіліп, алдағы уақытта Жол картасында көрсетіледі.