Пойызда төбелес шығарған азамат қоғамдық жұмысқа тартылды
Абай облысында пойызда жанжал шығарып, әріптесін ұрған 38 жастағы ер адам 90 сағат қоғамдық жұмысқа тартылды. Ол вахтаға бара жатқан жолда танысын бірнеше рет бет тұсынан ұрып, орташа дәрежедегі жарақат салғаны үшін кінәлі деп танылды, деп хабарлайды Rail-news.kz.
Сот шешімі бойынша азамат Аягөз аудандық пробация қызметінің есебіне алынған. Қызмет өкілдері оған жазаны өтеу тәртібі мен шарттарын түсіндіріп, жазадан жалтарған жағдайда жауапкершілік қарастырылатынын ескертті.
Сотталған ер адам ажырасқанын, кәмелетке толмаған бір ұлы барын, қазір ата-анасымен бірге тұратынын айтқан. Ол Аягөз қаласындағы коммуналдық кәсіпорындардың біріне қоғамдық жұмысқа орналастырылып, еңбек тәртібін сақтап жүр.
Пробация қызметі мұндай шаралар тек сот үкімін орындау үшін ғана емес, қайталама құқық бұзушылықтың алдын алу үшін де қажет екенін айтады.
Ал ер адамның өзі жасаған әрекетінің салдары өмірін күрт өзгерткенін мойындап, жазасын толық өтеуге дайын екенін жеткізген.