Пойыз қозғалысы қауіпсіздігі: 12 команда үздік жобаларын ұсынды
Атырау облысы бойынша меншікті тілші
Темір жолда қозғалыс қауіпсіздігі бір күндік не бір кезеңдік нәрсе емес, ол өмір бақи айтыла беретін процесс. Сондықтан оған үнемі көңіл бөлініп отырады. Астанада «Қазақстан темір жолы» ҰК» АҚ-ның «Пойыздар қозғалысы қауіпсіздігі бойынша үздік тәжірибелер» операциялық қауіпсіздігіне қатысты өткен үш күндік байқау да соның айғағындай. Оған еліміздің барлық өңірлерінен 12 команда, 60 теміржолшы-маман қатысты. Байқау барысында командалардың әрқайсысы пойыз қозғалысы қауіпсіздігін арттыруға бағытталған жобаны ұсынды.
– Байқау үш турдан тұрды. І тур – «Операциялық қауіпсіздіктің үздік тәжірибесі» деп аталды. Оның мақсаты – тәжірибе бөлісу және өз жобаңды қорғау. Сондықтан әр команда өз аймағында қолданылған үздік тәжірибелерімен бөлісті. ІІ тур – «Қозғалыс қауіпсіздігі мәдениеті – біздің іргетасамыз». Мұнда тренингтер, іскерлік ойындар, практикалық сағаттар болды. ІІІ тур – «Кейстерді талдау». Команда өндірісте болған оқиғаларды талдап, себебін анықтап, шешімін іздеді. Атыраудан әр түрлі құрылымдық бөлімшелерден 5 адам барып, бір команда болдық. Бізге байқау өте ұнады, – дейді Атырау вагон депосының инженері Бексұлтан Ақсисенов.
Бір қызығы, бұл жолы байқау қорытындысы алғаш рет дәстүрлі қазылар алқасының қатысуынсыз шығарылып, әр команда өз әріптестерінің жобаларын бағалап және жеңімпаздар алқалы түрде анықталған. Жобалар мәселенің өзектілігі, шешімнің өзіндік ерекшелігі, экономикалық тиімділігі, өлшенетін нәтижелері және таралым мүмкіндігі бойынша бағаланған. Ұсынылған бастамалардың қатарында пульт-таблоны жаңғырту, тежеу ережелерін оқыту әдістемелерін енгізу, иесіз малдардың соқтығысуын болдырмау жүйелері, локомотив сигнализациясының жұмысын жетілдіру және станциялардың өткізу қабілетін арттыру бар. Байқау қорытындысы бойынша бірінші орынды Маңғыстау өңірінің теміржолшылар командасы, екінші орынды Ақтөбе өңірі, үшінші орынды Ақмола өңірі иеленді.
- Біз байқаудан зор әсер алып қайттық. Ұйымдастырушыларға зор алғысымызды білдіреміз. Конкурс әділ, ашық, айқын түрде өтті. Байқау тәжірибе алмасу, жетістіктерді көрсету және теміржол қозғалысы қауіпсіздігі саласында инновациялық шешімдерді енгізу алаңына айналды. Қауіпсіздік мәдениеті – компанияның негізгі басымдықтарының бірі ғой, ал қызметкерлердің кәсібилігі мен жауапкершілігі – тасымалдау сенімділігінің негізі. Сондықтан мұндай шаралар жиі-жиі болып тұрса екен дейміз, өйткені ол маманның кәсіби шыңдалуына, қауіпсіздік мәдениетінің дамуына, ұжымның бірлігіне үлкен үлес қосады деп ойлаймыз, - дейді Бексұлтан.
Байқау нәтижесінде жеңімпаздарға ақшалай сертификаттар табысталып, әрбір қатысушыға қатысу сертификаты, ал белсенді қатысушыларға mini-MBA бағдарламасы бойынша одан әрі оқытуға арналған жекелеген бағыттар берілді.