Түркістанда өртке қарсы оқу-жаттығу өтті
Түркістан облысы бойынша меншікті тілші
Түркістанда азаматтық қоғамды қорғау мен қауіпсіздікті нығайту мақсатында өзара мүдделес мекемелердің бірлескен оқу-жаттығу жиыны өтті.
Станция аумағында ұйымдастырылған шараға «Әскерилендірілген теміржол күзеті» ЖШС Түркістан филиалының Түркістан станциясындағы атқыштар командасы қатысты. Сонымен қатар қала әкімінің арнайы өкіміне сай бұл жиынға Түркістан станциясындағы №29 өрт сөндіру пойызының жасағы мен жергілікті полиция өкілдері де жұмылдырылды.
Өрт-техникалық оқу-жаттығу сценарийі бойынша жылжымалы құрамдағы цистерна-вагоннан қауіпті жүк аммиактың төгілуі орын алды. Дереу дабыл қағылып, құрылымдық сала мамандары оқиға орнына шұғыл жетті. Талапқа сай әрекет еткен олар ең алдымен қауіпті жүгі бар вагон-цистерны құрамнан ажыратып, оңаша жолға қойды. Күзет қызметінің сарбаздары аумақты қоршауға алып, азаматтардың қауіпсіздігін қамтамасыз етті.
– Біздің команданың ерікті топ күзетшілері өздеріне тиесілі міндетті мінсіз атқарып, шеберліктерін шыңдады. Бұл жерде өзгенің өмірін сақтау мен мүлікті күзетуде қызметкерлердің өз қауіпсіздігіне қатысты қағидалар пысықталғанын атап өткен жөн, оқу-жаттығудың өзі шеберлікті шыңдау, бүгінгі шараға қатысқан құрылымдар төтенше жағдай орын алған жағдайда оған төтеп беретін дағды қалыптастыратын болады, – дейді Түркістан станциясындағы атқыштар командасы бастығының орынбасары Талғат Айтбеков.
Команда бастығы Әділхан Мұсаев оқу-жаттығу барысында әрбір қатысушылардың төтенше жағдай кезіндегі іс-әрекеттері өзара үйлесім тауып, практикалық тәжірибелерін толықтыратынына сенімді.