Оқушыларға қауіпсіздік мәселесі түсіндірілді
Ақтөбе облысы бойынша меншікті тілші
Жіңішке станциясының қызметкерлері мен теміржол сақшылары көктемгі каникул алдында мектептерді аралады. Оқушыларға теміржол өткелдерінде сақ жүру, станция маңын ойын алаңына айналдырмау түсіндірілді.
Жіңішке – жүк станциясы. Өңірдегі ферроқорытпа және хром қоспаларын өндіретін ірі зауыттармен тікелей жұмыс істейтін бірінші класты станцияда жүк құрамдарының қозғалысы үздіксіз жүріп жатыр. Жіңішке арқылы АҚШ, Жапония, Оңтүстік Корея, Франция, Германия, Қытай, Ресей елдеріне жүк жөнелту жолға қойылған. Сондықтан мұнда қауіпсіздік шаралары басты назарда.
Теміржолшылар мен желілік тәртіп сақшыларынан құралған топ 19 наурыз күні станцияға жақын орналасқан №36 мектепке барды. Оқушылармен кездесуде теміржол өткелдерінде ілінген ескерту белгілеріне назар аудару қажеттілігі айтылды. Жіңішке станциясы жолаушыларға арналмаған, мұнда жүздеген тонна жүк тиеп, жөнелтілетін жүк вагондары өтеді. Оның жылдамдығы бөлек, шұғыл тоқтау тіпті де мүмкін емес. Сондықтан оқушыларға теміржол өткелдерінде бейқам болмау ескертілді. Осыған дейін болған қайғылы оқиғалардан мысалдар айтылды. Қауіпті аймақта бейғамдық танытып қапияда ажал құшып қаза болғандар, жарақат алған жағдайлар бойынша оқиғалар баяндалды.
«Өткелде барлық ескерту белгілері бар. Алайда жүргіншілердің бейқамдығы басым. Жол өткелдерінде түрлі жағдайға ұшырып, жылжымалы құрам қозғалысына кедергі келтіріп жатқандар аз емес», – деді Жіңішке станциясы басшысының орынбасары Әлібек Жұмабаев.
Желілік полиция бөлімінің инспекторы оқушыларға ереже бұзу жауапкершілікке әкеп соғатынын түсіндірді. Балалардың қолымен жасалған бұзақылық, бүлдіру, жолға шығу жағдайларына ата-аналар жауапқа тартылатынын ескертті.