«Қауіпсіздік күні»: Сексеуіл депосының басшылығы нысандарды тексерді

Аптаның әр сәрсенбісі «Қауіпсіздік күні» болып саналатын темір жолда жол бөлімшелерінен бастап ірілі-ұсақты мекемелерге дейін қауіпсіздікті қамтамасыз етуге бағытталған іс-шаралар өткізіледі.

Сексеуіл локомотив пайдалану депосының басшылығы осы аптада Сексеуіл – Шалқар бағытына сапарға шығып, депоға қарасты нысандарға тексеру жүргізді.  

Депо бастығының өндіріс жөніндегі орынбасары Еркебұлан Аяғанов Шалқар айналым депосына барып, локомотив бригадаларының сапар алдында өтетін медициналық тексеруіне қатысып, көзбен көрді. Сонымен қатар локомотив бригадаларының демалыс үйіне барып, машинистер мен олардың көмекшілерінің тынығып, демалуына жасалған жағдайды тексерді.  

– Машинистердің сапар алдындағы және кейінгі медициналық тексеру барысын қарай отырып, онда алғашқы көмекке қажетті заттар, келісімшартта көрсетілген дәрілердің болуы, локомотив бригадаларының қан қысымын өлшейтін құралдардың жұмысын тексердік. Ал демалыс үйінде жуынатын, ас ішетін орындардың, жағдайын көріп, талапқа сай ма, локомотившілер тарапынан шағым жоқ па, қандай мәселелер бар, жанжақты саралауға тырыстық, ұсақ-түйек кем-кетіктерді жоюға күш салдық, – дейді Е.Аяғанов.  

Сонымен қатар Шалқар жөндеу депосында Сексеуіл локомотив пайдалану депосының тіркеліміндегі 2ТЭ25КМ сериялы тепловоздарды күрделі жөндеу процестері бойынша жұмыстар қаралып, өзара тәжірибе алмасу жайы және алдағы уақытта атқарылатын жоспар талқыланған.  

– Жалпы өткен жылды жақсы көрсеткіштермен қорытындыладық. Тепловоздардың жолда бұзылып қалып, жоспарсыз жөндеуге жіберілуі 10 пайызға азайды. Биылғы қарқын да жаман емес, барлық жұмыс рет-ретімен атқарылуда. Бірінші кезекте теміржолшылардың әлеуметтік жағдайын жасауға баса көңіл бөлінуде, – дейді депо бастығының өндіріс жөніндегі орынбасары.