Қауіпсіздік сызығынан аттама...
«Қазақстан теміржолшысы» газетінің тілшісі
«Заң мен тәртіп» тұжырымдамасын іске асыру аясында елордалық локомотив пайдалану депосының машинистері Көліктегі полиция қызметкерлерімен бірлесіп Астана станциясының Лесозавод ауданындағы ең қарқынды теміржол өткелдерінің бірінде «Қауіпсіз өткел» профилактикалық акциясын өткізді.
Астана станциясы тоғыз жолдың торабында орналасқан. Күніне жүздеген пойыз өтеді. Бір жақсысы, түрлі акциялар мен рейдтердің өткізілуі нәтижесінде жеті жылға жуық уақыт елорданың теміржол өткелдерінде жол-көлік оқиғалары орын алмапты. Десе де, сақтықта қорлық жоқ.
– «Қауіпсіз өткел» акциясы «ҚТЖ» ҰК» АҚ бастамасымен еліміздің барлық теміржол желісінде тұрақты түрде ұйымдастырылуда. Оның негізгі мақсаты – теміржол өткелдеріндегі жол-көлік оқиғаларының алдын алу және жүргізушілердің қауіпсіздік мәдениетін арттыру. Біз де акцияны қолдап, желілік полиция қызметкерлерімен бірлесіп, жеңіл және ауыр автокөліктер көп өтетін өткелде рейд өткізіп отырмыз. Оның барысында көлік жүргізушілеріне түсіндіру жұмыстарын жүргізіп, теміржол өткелдерінен қауіпсіз өту ережелерін еске салып, арнайы ақпараттық жадынамалар таратудамыз, – деп атап өтті машинист-нұсқаушы Алмаз Серікқазынов.
Акцияға қатысушылар өткелдердегі жол көлік оқиғаларының негізгі себептеріне назар аударды. Теміржолшылардың айтуынша, апаттардың басым бөлігі жүргізушілердің салғырттығы, асығыстығы және жол белгілерінің, бағдаршамдардың, сондай-ақ шлагбаумдардың талаптарын елемеу салдарынан орын алып жатады екен.
Машинистер қозғалыс кезінде пойызды бірден тежеу мүмкін емес, тоқтату жүздеген метрге созылатынын еске салды. Тіпті шұғыл тежеуді қолданғанның өзінде соқтығыстың алдын алуға әрдайым мүмкіндік бола бермейтіні айтылды. Ұлттық компания қауіпсіздік талаптарын бұзғаны үшін жауапкершілікті күшейту бағытында жүйелі жұмыс жүргізіп келеді. Компанияның бастамасымен 2025 жылы теміржол өткелінен өту қағидаларын бұзғаны үшін айыппұл 10 АЕК-тен 20 АЕК-ке дейін ұлғайтылды. Ал техникалық құралдарға, жүктерге және мүлікке зиян келтірілген жағдайда көлік құралын басқару құқығынан тоғыз айға айыру қарастырылған. Қазіргі уақытта қайталанған құқық бұзушылықтар үшін айыппұл мөлшерін және жүргізуші куәлігінен айыру мерзімін одан әрі қатаңдату мәселесі қаралуда екен.
«Қазақстан темір жолы» ұлттық компаниясы мамандары жүргізушілерді Жол қозғалысы ережелерін және теміржол өткелдеріндегі сигнал беру талаптарын қатаң сақтауға шақырады.