Әкелер жүрген ізбенен...

Ұлы Отан соғысындағы Жеңіс күнін жақындатуға атсалысқан тыл ардагерінің бірі – теміржолшы Сәми Қаратаевтың  ұлы  Мұхтар Қаратаев әкесі туралы естелігімен бөлісті. Айтуынша, әкесі соғыс жылдары Қызылорда вагон депосында вагон қараушы болып еңбек еткен.

Алайда 18 жастағы ұлы Зейнелғабиден соғысқа аттанып, майдан даласында ерлікпен қаза табады. Ұлының қазасы жанын жаралаған теміржолшы соғысқа сұранып әскери комиссариатқа сан рет барғанмен броньмен тылда қалған.  Ақсақалдың екінші ұлы, бүгінде «Жолаушылар тасымалы» АҚ «Экспресс» филиалының Астана телімінде I-санатты инженер болып еңбек етіп жүрген Мұхтар Қаратаев теміржолшылар әулетінің көшін жалғап, жыл сайын жеңіс күні әкесі мен ағасының есімін құрметпен еске алады.

Тылда жүрсе де майдан даласына керекті азық-түлік, қару тиеген вагондардың қауіпсіздігін қамтамасыз еткен теміржолшының табанды еңбегі үкімет тарапынан бағаланбай қалмады. Ол үнемі марапаттарға ие болып, ел теміржолының дамуына отыз жылдай еңбек сіңіріп, 1965 жылы зейнетке шығады.  

Теміржолшылар әулетінің бүгінгі көшін жалғаушы Мұхтар Қаратаевтың өзі еңбек жолын Қызылорда локомотив депосында бастаған. 30 жылдан бері қызмет етіп келе жатқан салада ол инженер, инспектор, ауысым бастығы қызметтерін атқарды.

– Бұл соғыс – қанша жыл өтсе де жазылмайтын жан жарасы. Талай отбасының шаңырағын ортасына түсіріп, қанша қайғы-қасірет әкелді. Әкем соғысқа мерт болған ұлын қанша жыл іздеп, ағамыздың Ресейде Бауырластар зиратында жерленгенін анықтадық. Біздің отбасымыз әкеміз бен ағамыздың есімін ешқашан ұмытпай, ұрпақтарға жеткізіп келеміз.  Қан майданда қаза тапқан ағамды да, теміржолда тыл ардагері атанған әкемді де мақтан тұтамын, – дейді М. Қаратаев.  

Слесарьдан бастап машинист көмекшісі, машинист болып еңбек еткен Мұхтар Қаратаевтың кезінде жолаушылар пойызын жайсыз жағдайдан аман алып қалған. 1997-2010 жылдары ішкі істер органында жұмыс істеп, Қызылорда облысындағы Желілік полиция бөліміндегі инспектордан бастап басшылық қызметтер атқарған.

Кейіпкеріміз ішкі істер саласынан зейнеткерлікке шыққаннан кейін теміржолдағы қызметін қайта жалғап, бүгінгі күнге дейін берекелі еңбек етуде. «Соғыс өрті елімізде енді қайталанбаса екен деп тілеймін! Аспанымыз ашық, халқымыз аман болсын!», – дейді тыл ардагерінің ұрпағы.