Жеңіс рухын сөндірмеген Қызылорда алауы

Қызылорда қаласының қақ төрінде әрі теміржол станциясына жақын орналасқан Мәңгілік алау ескерткіші – бүгінде ел рухына тағзым етіп, ұрпаққа өткеннің өнегесін жеткізіп тұрған қасиетті орын. Бұл мемориал – Ұлы Жеңістің құрметіне ғана емес, елге еңбек сіңірген теміржолшылардың да жанкешті еңбегін еске салар тарихи белгі.

Мәңгілік алаудың тұтану тарихында Қызылорда теміржолшыларының сіңірген еңбегі ерекше орын алады. 1975 жылы Ұлы Жеңістің 30 жылдық мерейтойы қарсаңында Қызылорда қаласында «Тағзым алаңы» ашылып, Мәңгілік алау тұтанды. Бұл тарихи сәтке Қызылорда локомотив депосының еңбек озаты Әкімгерей Бекбауов және Ұлы Отан соғысының ардагері, Сталинград шайқасына қатысушы Өмірзақ Маханбетов тікелей атсалысты. Олар Волгоград қаласындағы Мамаев қорғанынан алауды арнайы алып келіп, Қызылордада тұтатқан тұлғалар ретінде есте қалды.

Бұл оқиға тек бір сәттік рәсім емес, аймақтағы теміржолшылардың рухани және азаматтық жауапкершілігінің көрінісі болды. Қан майданнан оралған ардагерлер мен соғыстан кейінгі жылдары еңбек майданында тер төккен теміржолшылардың ұрпақтары бүгінде Қызылорда локомотив депосында еңбек етіп, бұл дәстүрді жалғастырып келеді.  

Мәңгілік алау тұтанғаннан кейін, 1976 жылы машинист-нұсқаушы Яков Козулин бастамасымен Қызылорда локомотив депосында тарихи-өлкетану мұражайы ашылды. Мұражайға аймақ теміржолшыларының өмірінен сыр шертетін көптеген жәдігерлер жиналды. Еңбек жолының әр кезеңінен естелік болып қалған фото, құжат, жеке заттар – бәрі байырғы теміржолшылардың мұрағаттарынан алынған. Уақыт өте келе бірқатар жәдігерлер облыстық тарихи мұражай қорына өткізілді.  

Бүгінде бұл мұражай Қызылорда жол бөлімшесіне келген әрбір қонаққа көрсетілетін, өңірдің теміржол тарихын көзбен көріп, жүрекпен сезінуге мүмкіндік беретін мәні терең, мазмұны бай мәдени орынға айналды. Бұдан бөлек Қызылорда локомотив пайдалану депосының ауласында ҰОС ардагерлеріне арналған аспан асты мұражайы да бар. Мәңгілік алау мен аспан асты мұражайы күні бүгінге дейін Жеңіс рухы мен еңбек абыройының ұлы символы ретінде өскелең ұрпақ тәрбиесіне қызмет етуде.