Жамбыл теміржолшыларының ерлік жолы

Жамбыл локомотив пайдалану депосындағы үлкен бір стенд Ұлы Отан соғысы жылдарына арналған. Мұражайдың бір бөлігінде тұтас қабырғаны алып тұрған стендте майдангер-теміржолшылар мен тыл ардагерлері жайлы деректер жинақталған.

Суреттер мен деректерді қарап көп ақпарат алуға болады. Олардың қай жылы соғысқа аттанғаны, қандай майданда шайқасқаны, құжаттар мен суреттердің көшірмелері, ескі газет қиындылары, бәрі-бәрі қаттаулы тұр. Жамбылдан аттанған теміржолшылар арасында Сталинград, Украина майданына қатысқан, «Суворов», «Кеңестік Беларусь» партизан отрядтарына түскен жауынгерлер де бар екен. Ал Александр Полещук атақты Панфилов дивизиясының сапында шайқасса, Леонид Щепкин есімді машинист 9-гвардиялық дивизиясының 31-атқыштар полкінде Великие Луки қаласын азат етуге қатысқан.  

Алғашында Алматыда жасақталған 316-атқыштар дивизиясына Мәскеу түбінде көрсеткен ерлігі үшін 8-гвардиялық атқыштар дивизиясы деп аталған панфиловшылардың қан майданда батырлық пен жоғары жауынгерлік дайындықтың үлгісін көрсеткені тарихтан белгілі. Осы дивизияның құрамында соғысқа кірген Александр Полещуктың майданда даңқты қолбасшы И.В.Панфиловпен, осы дивизияның 19-атқыштар полкын басқарған командир Бауыржан Момышұлымен кездескен болуы да ғажап емес. Панфиловтың қызы Валентина Панфилованың облыстық өлкетану музейіне емес, дәл осы депоға әкесі мен өзінің соғыс жылдарындағы суреттері мен құжаттарының көшірмелерін әкеліп тапсыруында да ішкі бір рухани байланыс жатқандай.  

Жалпы осыдан жарты ғасырдан астам уақыт бұрын депода музей ашылғанда оған алғашқы жәдігерлерді ол кезде көзі тірі майдангер-машинистер өздері әкеліп тапсырған екен. Кеңес және неміс солдаттарының оқ тескен шлемдері, оқ-дәрінің түр-түрі, жауынгер котелогы, компас, пышақ, тағысын-тағы... тарихтан сыр шерткен жәдігерлер қанқұйлы соғыстың бейбіт халыққа тигізген ауыр зардабын еске салады. Жамбыл локомотив пайдалану депосынан майданға 200-ден астам теміржолшы аттанған.