Темір жол тарихы жайлы жаңа кітап жарық көрді
Абай облысы бойынша меншікті тілші
Теміржолшылардың кәсіби мерекесі қарсаңында Семей темір жолының тарихына қатысты тың туынды жарық көрді.
Құрметті теміржолшы, «Түрксіб-Семей» мұражайының құрметті директоры, қоғам белсендісі Мақсұт Көшжановтың «Адам – керуен, өмір – жол» атты кітабы оқырманға жол тартты. 88 жасқа аяқ басқан ардагердің бұл кітабы Қазақстан темір жолының 120 жылдығына, Семей теміржолының 110 жылдығына және алдағы жылғы Түркістан-Сібір теміржолының 95 жылдығына арналыпты. Мемуарлық туындыда Қазақ темір жолына қатысты бұрын-соңды айтылмаған тың дүниелер мен құжаттық деректер мол. Кеңес дәуіріндегі теміржолшылардың жанкешті еңбегі, Тәуелсіздіктің алғашқы жылдарындағы ерлікке пара-пар қызмет жайлы да кеңінен сөз болған. Өлке теміржолына өлшеусіз еңбегі сіңген Қаныбек Ержанов, Құдайберген Көпжасаров сынды танымал тұлғалар жайлы жылы естеліктер де айтылады.
Құрметті теміржолшы Мақсұт ақсақал бұл кітабында өзі ұстаз тұтқан, әр жылдары Семей теміржолында бірге еңбек еткен кешегі Түрксіб құрылысын салған теміржолшылар мен басшылар, олардың бүгінгі ұрпақ үшін ертегіге бергісіз, үлгі тұтарлық ерен еңбектерін үлкен құрметпен еске алады.
Шығыстағы сала қызметкерлері арасында танымал, жастар «Музей ата» атайтын Мақсұт Көшжанұлының бұл туындысы – сөз жоқ, тарихи тұрғыдан аса құнды еңбек. Кітап теміржолшылар қауымына, қазақ теміржолын зерттеушілерге, жалпы көпшілікке арналған. Тілі де тартымды жазылған, мұрағат құжаттары мен тарихи фотосуреттер де қоса берілген.