Елге – ұран, ұрпаққа – үлгі
Қызылорда облысы бойынша меншікті тілші
Ұлы Отан соғысы жылдарында теміржолдың және теміржолшылардың алар орны ерекше болғаны мәлім. Мысалы, Қызылорда паровоз депосынан майданға шақырылған 230 адам Жол қатынастары халық комиссариатының ерекше резервінде соғысқа қатысқан.
Солардың бірі – Қызылорда паровоз депосының машинисі Петр Спирин екі мәрте «Құрметті теміржолшы» атағын алып, «Ерлігі үшін» медалімен марапатталса, 1945 жылдың шілде айында 7-колонна үкіметтің ерекше тапсырмасымен Жоғарғы Бас қолбасшы мен үкімет делегациясын Подстам конференциясына жеткізіп салу құрметін иеленіпті.
Бригада құрамында болған машинист Петр Спирин Варшава-Познань учаскесінде пойыз басқарып, 1948 жылға дейін Берлин бағытындағы жолаушылар пойызын алып жүруге қалдырылған. Сонымен қатар ауыр жараланған жауынгерлердің санитарлық пойызын майдан шебінен алып шығуда көрсеткен ерлігі үшін машинист Владимир Дубинге Социалистік Еңбек Ері атағы берілген. Міне, кішкене ғана Қызылорда депосындағы айбыны асқақ ерліктің үлгісі осылай депоның алғаш құрылған күнінен бастау алып, күні бүгінге дейін жалғасын тауып келеді. Ерліктің тек қан майданда ғана емес, бейбіт күнде де салтанат құратынына Социалистік Еңбек Ері Оразбай Әбішевтің соғыс жылдары депода атқарған еңбегі дәлел.
– Біздің бөлімшеде кешегі қан майданда да, одан кейінгі бейбіт күнде де ерліктің үлгісін жасаған майталман теміржолшылар болды. Майдан шебінде жүріп Үкіметтің тапсырмасын орындаған депо машинисі Петр Спиринге артылған жауапкершілік біздің Сыр бойы теміржолшыларына артылған сенім болып саналады. Сала мамандарына деген сенім әлі де сол күйінде. Себебі біздер бейбіт күнде ерен еңбектің үлгісін жасап келеміз. Теміржолшылардың ерлігі еш уақытта ұмытылмау үшін қазіргі таңда депо мұражайындағы жәдігерлер тарихтан сыр шертіп, ұрпақтан ұрпаққа жетуде, – дейді теміржолшы ардагерлер кеңесі филиалының төрағасы Сисен Шермаханов.