Модуль-флешка: соңғы үлгідегі тиімді құрылғы

Еліміздің локомотив пайдалану деполарында таспа тілін оқитын инженерлердің ДМР-Н модуль-флешкасы пайдаланыла бастағанына көп уақыт бола қоймады. Арнайы компьютерде қолданылатын бұл құрылғы технологиялық тұрғыдан жетілдірілген соңғы үлгідегі нұсқа болып табылады.

Түркістан локомотив пайдалану депосы таспа бөлімінің жетекшісі Маржан Әнуарқызы заманауи құрылғы осы күні қолданыстағы қағаз таспа мен кассеталық таспамен қатар пайдаланылатынын айтады. Оның артықшылығы сол, таспадағы деректер электронды үлгіде тасымалданады. 

Талап бойынша модуль-флешканы тиісті құжаттарымен бірге cапарға алып шыққан машинист, оны локомотивтегі арнайы аппаратқа орнатқаннан кейін ғана қозғалысты бастауы тиіс. Өйткені жылжымалы құрамның жүріп-тұрғанына қатысты деректерді осы модуль-флешка тіркейді. Ал кеңседегі қызметкер ақпаратты ДМР-Н құрылғысының көмегімен арнайы компьютерге өткізіп, инженерлер тарапынан қозғалыстың қалай болғаны мұқият тексеріледі. 

– Осы электронды үлгі санатындағы модуль-флешка ұсынатын ақпараттардың элементтері мейлінше жетілдірілген. Әсіресе машинист қырағылығына қатысты деректердің барлығы да компьютер экранында түрлі-түсті сызықтармен айқын көрініс береді, – дейді модуль-флешканы оқу маманы Гүлнұр Құлымбетова. 

Мәселен, қағаз таспа үлгісінде машинистің белгі беру түймесін басқан-баспағаны анық көрініп тұрмағандықтан, ондағы сызықты инженерлер шаблонға салып, өлшеу арқылы анықтайды. Ал жаңа жүйеде оның бәрі нақты көрінеді. Тіпті сигнал түймесін қанша уақыт басып тұрған ұзақтығына дейін экранда шығады екен. 

Сонымен қатар мұнда машинистің қырағылық деңгейін көрсететін бөлек сызық болады. Негізінен пойыз әр станцияға кірер алдында дабыл қағылуы тиіс. Бұл – бұлжытпай орындалатын талап. Себебі машинистің дабыл түймесін басқанына қарап, оның ұйқылы-ояу немесе сергек жүргенін байқауға болады. Ал дабыл соғылған сәттегі қара сызықтың көрсеткіші жоғары-төмен иректеле түседі. Ол кезде кабинада басқа қоңырау белгісі берілмейді. Нәтижесінде бірсыдырғы бейнеленген сызыққа қарап, машинистің қырағылығы бағаланады. Ал машинистің кемшілігі анықталған жағдайда тиісті деңгейде шара қолданылады. Себебі ондай қателікке бой алдырудың соңы үлкен қауіп-қатер тудыруы мүмкін. 

Қысқасы, машинистің жол сапары, қозғалыс қауіпсіздігін сақтауы, тапсырма дұрыс не бұрыс орындалғанын айна-қатесіз жазып алатын модуль-флешка машинист әрекетін бағалайтын заманауи тиімді құрылғы болып отыр.