ҚТЖ мен Wabtec Қызылорда облысындағы Оқушылар шығармашылығы сарайының 30%-ын салып үлгерді
Қызылорда облысы Арал ауданының Сексеуіл кентінде маңызды әлеуметтік нысан - Оқушылар шығармашылығы сарайының құрылысы қарқынды жүргізілуде, деп хабарлайды Rail-news.kz.
Ауқымды жоба «Қазақстан темір жолы» ҰК» АҚ мен әлемдік технологиялық көшбасшы Wabtec компаниясы арасындағы ұзақ мерзімді стратегиялық ынтымақтастықты кеңейту аясында іске асырылуда.
Бүгінде құрылысшылар жоспарланған жұмыстардың жалпы көлемінің 30%-ын орындап, бекітілген кестені қатаң сақтап келеді. Қазақстан өңірлерінде заманауи білім беру инфрақұрылымын дамыту ҚТЖ мен Wabtec арасындағы әлеуметтік өзара іс-қимылдың негізгі бағытына айналды. Болашақ Шығармашылық сарайы көпфункционалды инновациялық хаб ретінде жобаланған. Нысан бір шаңырақ астында 100 орындық Оқушылар үйін және 50 орындық Өнер мектебін біріктіреді.
Екі қабатты ультразаманауи ғимараттың жалпы ауданы кемінде 1 950 шаршы метрді құрайды. Мұнда Арал өңірі балаларының шығармашылық, зияткерлік және ғылыми әлеуетін ашуға барлық жағдай жасалып, олардың әлемдік деңгейдегі сапалы қосымша білімге қол жеткізуі қамтамасыз етіледі.
Нысан құрылысы Қызылорда облысының экономикасына тікелей оң әсерін тигізуде. Жобаны іске асыруға 120-дан астам жоғары білікті маман тартылған. Ғимарат құрылысында отандық өндірістің сапалы құрылыс материалдары барынша кеңінен қолданылуда. Нысан пайдалануға берілгеннен кейін өңірде мұғалімдер, әкімшілік және техникалық қызметкерлер үшін шамамен 100 тұрақты жұмыс орны ашылады.
Wabtec тарапынан мұндай бастамаларға қолдау көрсетілуі америкалық машина жасау алыбының тұрақты даму қағидаттарына (ESG) сай әрі өзі жұмыс істейтін елдерде әлеуметтік жауапкершілігі жоғары екендігін көрсетеді. ҚТЖ-мен бірлесіп қазақстандық өскелең ұрпаққа қолдау көрсете отырып, серіктестер өңірдің болашақ дамуы мен өркендеуіне берік негіз қалауда.