Назарда – автотежегіштер дайындығы
Алда күздің құбылмалы, қыстың қытымыр күндері. Бейнеу локомотив айналым депосында өткен жиында Маңғыстаудағы автотежегіштердің жағдайы пысықталып, қауіпсіз қозғалысты қамтамасыз ету жайы қаралды.
Жиында сала мамандары өткен сегіз айда қанша рет автотежегіш қолданылды, себебі не, қандай жағдайлар орын алды, қателік қай жақтан және техниканың қандай кемшілігі болды... тағысын тағы мәселелер түгел сөз болды. Әрине, автотежегіш қолдануда жолға ауа жайылған мал мен жанның кесірі аз емес екені белгілі, бірақ сонымен қатар техникалық жағдайлар да сарапқа салынды.
Маңғыстау жүк тасымалы филиалы директорының орынбасары Ерлан Бүркітов, Қозғалыс қауіпсіздігі департаментінің Маңғыстау аймағы бойынша бас ревизоры Болат Дүйсәлиев, Маңғыстау вагон депосы басшысы Сәрсенбай Есенқұлов, локомотив пайдалану депосы басшысы Сәндібай Күзенбаев өз пікірлерін білдірді.
«Мақсатымыз – жылжымалы құрамның автоматты тежегіш жабдықтарының қыс мезгілінде үздіксіз және қауіпсіз жұмысын қамтамасыз ету. Сондықтан конференцияда жылжымалы құрамның тежегіш жүйесінде болатын ақаулықтарды талдап, жолдағы ойламаған жерден тап болатын жағдайлардың алдын алу бойынша шаралар әзірленді. Дайындықтағы ерекшеліктер талқыланды. Қызмет көрсету және қыстыгүні автотежегіш жабдықтарын пайдалану, тежегіш рычагты реттеуге ерекше назар аударылды», – деп ақпар берген бас ревизор Маңғыстаудағы қауіпсіздік көрсеткіштеріне де тоқтала кетті.
Айтуынша, жыл басынан бергі сегіз айда Маңғыстаудағы қауіпсіздік жағдайының кері көрсеткіші былтырғы салыстырмалы мерзімдегіден артқан. Өткен жылы 1,5 балл болса, биыл 4 балды құраған. Көрсеткішті жоғарылатып отырған оқиға наурыз айында Маңғыстау станциясында маневр кезінде тепловоздың төрт жолаушылар вагонына барып соғылуы болып отыр. Салдарынан әртүрлі зақымдалулар болып, жылжымалы құрам жөндеуге жіберілген. Сондай-ақ балдың артуына Бейнеу станциясында адам қағып кету жайты да қосылған.
Конференцияға ТД-2 автотежегіштер машинистнұсқаушысы Рамиль Құттымұратов, автотежегіш нұсқаушысы Әлібай Жұмабаев, ВЧД-33 бастығының орынбасары Сәкен Рабаев, вагон қараушы Бауыржан Ізбасқанов, аға вагон қараушы Бикенбай Ерғалиев, РБТ-14 локомотив шаруашылығы бойынша қозғалыс қауіпсіздігі ревизоры Оралбай Абдашов, ТД-2 машинисі Мақсат Абдашов, Мақсат Қамысбаев, Болатбек Ұзақов белсенді қатысып, өз пікірлерін ортаға салды.