Күні-түні құммен алысқан бейнеуліктерге адам күші жетіспейді (+видео)

Бейнеу жол дистанциясы жұмысшыларының ала жаз бойы шаңды дауылмен алысып, таң атқаннан күн батқанға дейін жолды тазалауы аздай, күздің келуімен желдің үдей түсуі жағдайды одан әрі ушықтыра түскен. Әсіресе, биыл өңірде болған қуаңшылық салдарынан шөптің шықпай, ал бұрындары бой көрсеткендерінің аптап ыстықта қурап күйіп кетуі құмның емін-еркін көшуіне жағдай жасапты, деп хабарлайды Rail-news.kz. Өздерінің күнделікті негізгі міндетінен бөлек, табиғаттың «тосын мінезінен» туындаған проблемамен алысып жатқан жолшыларға тағы бір проблема қосылып отыр. Ол – аш қарынға азық іздеп теміржол бойымен ауа жайылған малды торуылдау. Бұл теміржолшылардың тегін атқаратын жұмысына айналған. Мекеменің міндеті теміржол қозғалысының қауіпсіздігін үздіксіз қамтамасыз ету болғандықтан дистанцияда басшыдан бастап, кәсіподақ, кадр бөлімі, инженер, ер-әйел демей бәрі қолға күрек алған екен. Сондай бір сәттің куәсі болдық.

– Бір апта тынық болса, екі апта құм борайды. Жол жөндеушілердің еңбегі мүлдем көрінбейді, жолды бүгін тазаласаң, ертең тағы топырақ басады. Жұмысшыларымыз жақында түнімен кезекшілікте тұрып, көміліп қалған жолды аршыды. Ауа райы құбылмалы. Кейде тіпті үлгере алмай жатады. Мұны көріп, бүгін біз де көмекке келдік. Сенбілік ұйымдастырып тағы да жәрдем беретін боламыз, – дейді кәсіподақ ұйымының төрағасы Мұстафа Қожбанов.

Одан әріректе техникалық бөлім басшысы Гүлжан Сариева да өзіне берілген жердің құмын шығарып жүр екен. Жолды ашуға адам жетпей, қапылыс болып жатқандықтан қолғабыс етуге келген ол жолдың топырағын тазалауға алынған арнайы жұмысшылардың санын және олардың жұмыс мерзімін ұзарту керек екенін айтады.

– Бізге қарасты аймақтағы темір жол ұзындығы 575 шақырымды құрайды. 230 жол монтеріміз бар. Оңтайландыру бағдарламасына байланысты сырттан жұмысшы ала алмаймыз. Топырақ басқан жерлерді тазалауға біздің жолшылар жетіспей жатқасын, басшылық мамыр айында 35 адамды алты айға уақытша жұмысқа жіберді. Енді олардың кету мерзімі таяу. Алдымызда қыс. Адам санының қажеттілігі бұрынғыдан да артуы мүмкін.

Штатқа жұмысшы қабылдауға мораторий бар. Сондықтан уақытша жіберілген адамдардың мерзімін тағы да ұзартуды сұраймыз. Бейнеуде қыста қар көп болмаса да, жел жиі соғады. Табиғаты қатал. Бұрындары да құм басып тұратын, бірақ дәл биылғы жағдай ерек. Құмды тоқтатуға қойған кедергілерден қатты жел-боранда қайыр жоқ. Техниканың көмегіне жүгінейік десек, әзірге ондай машина шығарылмаған. Бастапқы кездері қар тазалайтын техниканы құмға қолданып көрдік. Пайдасынан зияны көп болды. Мойынтіректер ішіне құм кіріп, бұзыла берді. Қолмен тазалаудан басқа амал қалмады. Қазір күшіміз топырақты тек жолдың шетіне тастауға жетеді. Жақында қатты жел тұрып, адамдарымыз екі-үш күн түнімен кезекшілікте тұрды. Түнде істеген адам ертесіне демалу керек, – деп бейнеулік жолшылардың бейнетін баяндады дистанция бастығы Берікбай Айтманов.

ҚҰМ КӨП БАСАТЫН ЖЕРЛЕР БЕЙНЕУДІҢ ҚАСЫНДАҒЫ 5,6,8 ЖӘНЕ БЕЙНЕУ–ШАЛҚАР ТЕЛІМІНДЕГІ 431-438 ШАҚЫРЫМДАР ЕКЕН. Б ПАРКІ МЕН БЕЙНЕУ СТАНЦИЯСЫ, САМ МЕН НОҒАЙТЫ АРАСЫНДАҒЫ ЖОЛДАРДА ДА ҚҰМ БАСУҒА ҚОЛАЙЛЫ АЙМАҚ БОЛЫП ОТЫР. ДИСТАНЦИЯ ЖҰМЫСШЫЛАРЫ ПОЙЫЗ КӨП ҚАТЫНАЙТЫН, ҚҰМДЫ ЖЕРЛЕРГЕ ӨЗ КҮШІМЕН КЕДЕРГІ РЕТІНДЕ МАШИНАНЫҢ ДОҢҒАЛАҚТАРЫН, ЖОЛДАН ШЫҚҚАН ШПАЛДАРМЕН ТОСҚАУЫЛ ҚОЮДА ЖӘНЕ ҚАРҒА ҚАРСЫ ҚОЙЫЛҒАН ҚОРШАУЛАРДЫ ПАЙДАЛАНУДА.

Дистанция басшысының айтуынша, құм көп басатын жерлер Бейнеудің қасындағы 5,6,8 және Бейнеу–Шалқар теліміндегі 431- 438 шақырымдар екен. Б паркі мен Бейнеу станциясы, Сам мен Ноғайты арасындағы жолдарда да құм басуға қолайлы аймақ болып отыр. Дистанция жұмысшылары пойыз көп қатынайтын, құмды жерлерге өз күшімен кедергі ретінде машинаның доңғалақтарын, жолдан шыққан шпалдармен тосқауыл қоюда және қарға қарсы қойылған қоршауларды пайдалануда. Дегенмен бір шеті Өзбекстан шекарасына дейін созылған көлемді аумаққа қызмет көрсететін дистанция үшін бұл әрекет қазір теңізге су сепкендей. Аумақ ауқымды, қозғалыс көп. Бұл жолмен төрт бағытта – Тассай, Сай-Өтес, Қарақалпақстан, Атырауға қарай 15 жұптан, күніне 30-ға жуық пойыз өтеді.

– Құммен күресу басталғалы бірнеше рет пойыздар жылдам- дығын азайтуға мәжбүр болдық. Екі қолға бір күрек, инемен құдық қазғандай өнімсіз. Кейде жолдың беті көрінбей, құм-топырақ астында қалады. Оны ашуға қара күш керек. Жұмысшылар да шаршайды. Қашан көрсең де тамақ-суын арқаланып бара жатқаны. Айдалада жел-құммен алысып отырып тамақтанады. Оңай емес, бірақ қозғалысты тоқтатпау керек. Басшылық тағы да қолдап, уақытша жұмысшыларды жіберсе деген тілек бар, – дейді Берікбай Айтманов.

[playlist type="video" ids="9883"]