Үздік құрама анықталды (Фото)
![](https://rail-news.kz/uploads/2023/08/31/nKkGhyrhmES0knOQycSPsWPhoKAszIThyx3Hhtix.jpg)
![](https://rail-news.kz/img/noimg.png)
Қызылорда облысы бойынша меншікті тілші
Қызылорда станциясында «Қазкөліккәсіп» ҚБ кубогы үшін теміржол футбол лигасының шағын футболдан іріктеу туры өтті. Дүбірлі додаға аймақтағы салалық ұжымдардан 8 құрама команда қатысып, жеңімпазға берілетін жолдаманы сарапқа салды.
Динамо спорт кешенінде өткен спорт сайысы ә дегеннен қызу басталды. Алдымен командалар бір-бірімен ойнап, ұпай санымен төрт құрама суырылып алға шықты. Жүлделі орын үшін тартысты ойын өрнегін өткізген олардың арасынан да үздіктер бір саты алға озып, нәтижесінде Қызылорда локомотив пайдалану депосының «ТЧЭ-34» құрамасы 3-орын, Қазалы айналым депосының «ТД-23» құрамасы 2-орын алса, Сексеуіл локомотив пайдалану депосының «ТЧЭ-36» командасы жүлделі жолдаманы еншіледі. Үздік ойыншылар мен командаларға кәсіподақ ұйымдары тарапынан диплом мен бағалы сыйлықтар тарту етілді.
![](https://rail-news.kz/uploads/attachments/img-20230828-wa0013-64f02df0d3e3e.jpg)
Турдың үздік қорғаушысы Қызылорда қосалқы бөлімі «НОДГП-10» командасының ойыншысы Бахытжан Жолдасбаев, үздік ойыншы аталымы «ЭЧ-25» Қызылорда электрмен жабдықтау дистанциясының инженері Бейбіт Каменовке, үздік қақпашы аталымы Қызылорда жол дистанциясының «ПЧ-57» командасының қақпашысы Бақытжан Рыспановқа бұйырды.
![](https://rail-news.kz/uploads/attachments/img-20230828-wa0018-64f02df7d7517.jpg)
Жүлдегерлерді марапаттауға «Қазкөліккәсіп» ҚБ Қызылорда филиалының төрағасы Бауыржан Ахметов жалпы осындай форматта өткізілетін спорттық жарыстардың ұжымдық ынтымағының беки түсуіне себеп болумен қатар денсаулықтың шыңдалуына және әріптестер арасындағы қарым-қатынастың нығайып, достыққа ұласуына себепші болатынын жеткізіп, барлық командаларға алғыс білдірді.
![](https://rail-news.kz/uploads/attachments/img-20230828-wa0016-64f02e05389c5.jpg)
![](https://rail-news.kz/uploads/attachments/img-20230828-wa0019-64f02e09ad0af.jpg)