Суықбұлақ станциясы жүк тиеуден рекорд жасады

Жарма – Жаңа-Семей телімінің 739,9 шақырымында орын тепкен 3-ші класты Суықбұлақ станциясы ағымдағы жылдың алғашқы тоқсанында жүк тиеуден рекордтық көрсеткішке қол жеткізді.

Биылғы төрт айда жүк тасымалы бойынша басты ерекшелік құрылыс материалдарын тиеу көрсеткіштерінің жоспардан асыра орындалуы болып отыр. Станциядан қазіргі күні тәулігіне 95-100 вагонға дейін әктас пен қиыршық тас тиеліп жөнелтіліп жатыр. Жалпы, Шығыс өңірінде жылдың алғашқы айларында жүк тиеу мен тасымалдау біршама саябырлайтынын ескерсек, мұның өзі жоспарды толық орындау үшін үлкен көрсеткіш саналады. 

Жергілікті теміржолшылар құрылыс заттарын тиеуге тапсырыс беретін «Алина» ЖШС, «Семей цемент зауыты» АҚ, т.б. өнеркәсіп орындарымен ынтымақтастықты нығайта отырып, тиелетін жүк көлемін жыл соңына дейін 1,0 млн тоннаға жеткізуді жоспарлап отыр. Яғни, негізінен құрылыс материалдарына қажетті шикізат тиелетін Суықбұлақ станциясындағы өндірістік процестер осы себептен артуда. 

– Біздің станциядағы жүк тиеу, түсіру жұмыстары маусымдық болып саналмайды. Қысы-жазы бір қалыпта, 24 сағат көлемінде қызмет көрсетеміз. Қазіргі күндері тұрақты түрде тәулігіне 90 вагонға жүк тиеп жолға шығара аламыз. Кейде тапсырыс саны күрт артып кететін кездер де болады, – дейді станция басшысы, жас та болса білікті теміржолшы болып танылып үлгерген Ернұр Талғатұлы. 

Осы төңіректе орналасқан үш зауыттың өндіріс көлемін еселеп арттыруы қосымша шараларды қолға алуға мәжбүрлейді. Ағымдағы жылдың 4 айы ішінде бес мыңның үстіндегі вагонға жүк тиеліп, жолға шығарылған. Бұл көрсеткіш екінші жартыжылдық бойынша жоғарылай түседі деген болжам бар. Небәрі 16 теміржолшы еңбек ететін станция ұжымына салмақ та артуда.  

– Тиелетін жүк саны да жылдан-жылға өсіп келеді. Әсіресе, биылғы жылдың алғашқы айлары ерекше болып тұр. Ендігі аралықта өндіріс барысында табысты еңбек ету мен қозғалыс қауіпсіздігін сақтау ғана біз үшін бұлжымас міндет. Бұл тарапта қолға алған жұмыстарымыз нәтижелі орындалып жатыр, – дейді станция басшысы. 

Жуырда көктемгі комиссиялық тексерумен Суықбұлақ станциясында болған бөлімше басшысы Владимир Бабиченко мұндағы жүк тиеу, жүк пойыздарын жөнелту мен бос вагондарды қабылдап алу шараларымен танысып, алдағы уақыттарда өндірістік процесті техникалық талаптарға сай жүргізу және жұмыс барысын жеделдету бойынша бірқатар тың шаралар қабылдау туралы мәселе көтеріпті. Демек, құрылыс материалдарын жөнелту бағытында қарқын алған жұмыстар жаңашылдықтармен толыға түседі деуге толық негіз бар. 

Жалпы, бүгінде Семей ЖТ бөлімшесі бойынша жыл үлесінде атқарылуы тиіс іс-шаралар легі бекітіліп, жоспарға сай жүргізілуде. Бұл орайда жүк айналымын арттыру бойынша қолға алынған жұмыстар ойдағыдай нәтиже беруде. Яғни, жыл үлесіндегі көрсеткіштер де арта түседі деген сөз. Оған шағын болса да ауқымды жұмыс атқарып отырған Суықбұлақ та өз үлесін қосады.