Сарышаған станциясына 70 жыл
Тараз қаласы бойынша меншікті тілші
Биыл Сарышаған станциясының 70 жылдығы аталып өтпек. Станцияның құрылысы Шу – Мойынты телімінің құрылы сымен қатар жүргізілген.
Сондықтан Шу – Мойынты телімінің пайдалануға берілгеніне 70 жыл толатын биылғы жылы станция да өз мерейтойына дайындалуда. Жалпы, Сарышаған кенті Қарағанды облысына қарағанымен, ондағы теміржол мекемелері түгел дерлік Жамбыл бөлімшесіне қарайды.
Кешегі күні станциядағы барлық теміржол мекемелерінің басшылары, кент әкімшілігі мен ақсақалдар алқасы бас қосып, атаулы күнді атап өту жөнінде кеңесті.
– Станцияның 70 жылдығы тамыз айының алғашқы демалысы – Теміржолшылар күні аталып өтетін болды. Келісім бойынша Балқаш көлінің жағасына киіз үйлер тігіліп, ұлттық ойындар ұйымдастырылады. Іс-шараға ардагерлер мен еңбек адамдары шақырылып, марапатталады, – дейді Жамбыл магистральдық желі бөлімшесі директорының Шу өңірі бойынша орынбасары Азизхан Қалыбаев.