Суықбұлақ станциясы қайта жаңғырды
Абай облысы бойынша меншікті тілші
Биылғы жаз семейлік теміржолшылар үшін шын мәнінде жаңарту мен жаңғырту жылы болды. Жол табанынан бөлек желі бойындағы көптеген ғимараттар жаңа келбетке ие болып жатыр.
Әсіресе шалғайдағы станциялардағы нысандар жөнделіп, қызмет барысындағы қолайлылық артуы жергілікті тұрғындарды қуантып отыр. Мысалы, Жаңа-Семей-Шар телімінің 739,9-шақырымында орын тепкен, сонау Түрксіб дәуірінде салынған 3-ші класты Суықбұлақ станциясын алайық. Қазіргі таңда аталмыш станцияның сыртқы келбеті де, ішкі қызметтік бөлмелері де толықтай өзгеріп, жүз пайыз жаңарды деуге болады. жергілікті теміржолшылар мен ардагерлер игілікті шараға бастамашы болған бөлімше басшысы Владимир Бабиченкоға алғыс білдіруде.
Енді ше, станцияның тозыңқырап тұрған сыртқы келбеті қазіргі заманға сай әрленіп, қызметтік бөлмелер қайта жаңғыртылды. Суық өткізбейтін материалмен жылыланды. Станция бастығының кабинеті, жылыту қазандығы, техникалық кабинет, тауар кассирлері отыратын бөлмелер мен пойыз құрастырушыларының орындарына дейін қайтадан жаңғыртылды. Тіпті, қоймаға дейін күрделі жөндеуден өткізіліпті. Жүргізілген шаралар қысқа мерзім ішінде сапалы жүргізіліп, көзделген уақытта аяқталды. Станция бастығы Ернұр Тұрсынбаевтың айтуынша, күрделі жөндеу жұмыстары қызмет ырғағына кедергі келтірмеген.
Сондай-ақ бөлімше басшылығының бастамасымен бірқатар станциялардағы нысандар күрделі жөндеуден өткізілген. Семей, Өскемен, Дегелең, Жаңа-Семей, Шар станцияларындағы көптеген теміржол нысандары жаңа кейіпке еніп, қосымша құрылыстар да жүргізілді.