Түркістанның гүлденуіне теміржолшылар үлкен үлес қосып отыр
Түркістан облысы бойынша меншікті тілші
Бүгінгі таңда Түркістан түркі әлемінің рухани астанасы ретінде туристік орталыққа айналып келеді. Ал оның өсіп-өркендеп, дами түсуіне жергілікті теміржолшылар елеулі үлес қосып отыр десек қателеспейміз.
Бүгінде станция тәулігіне 15 жұп пойыз қабылдап, осыншама жылжымалы құрамды жөнетіп отырады. Бұл жүк және жолаушылар пойызын қоса есептегендегі көрсеткіш. Станция бастығы Қадыр Сырлыбеков бұрын бұл көрсеткіш 10-13 пойыз болғанын айтады.
– Түркістан облыс орталығы атанған соң, мұнда пойыздардың келіп-кетуі жиіледі. Айталық, станциямыздың тәуліктік жолаушы ағыны бұрын – 100-120 адам болса, қазіргі көрсеткіш 350-400-ге дейін көтерілді. Осылайша, Түркістан облыс орталығы ғана емес, түгел түркінің астанасы ретінде туристік орталыққа айналып келеді, – дейді Қадыр Қаңлыбайұлы.
Жалпы, соңғы жылдары Түркістанға қатынайтын жолаушылар пойызының қатынау жиілігі де артқан. Соның ішінде, айрықша атап өтерлігі елдің солтүстігі мен оңтүстігін жалғайтын «Түркістан–Павлодар» пойызы жолға шыққан. Сондай-ақ, аталған станциядан бастау алатын облысаралық «Түркістан–Қызылорда» пойызы мен қаламаңы санаттағы «Түркістан–Сарыағаш» және «Түркістан–Шымкент» пойызынан бөлек, бұл жерде 11 жолаушылар пойызына қызмет көрсетіледі.
Учаскелік санаттағы бірінші класты станцияның 16 жолының 10-ы тікелей жөнелту мүмкіндігіне ие болса, қалған 6-ы сұрыптап-жөнету жолдары.
– Бұдан бөлек, бізде кішігірім сұрыптау дөңесі бар. Ол жерде қазіргі кезде Қызылордаға дейінгі разъездерге жеткізілетін вагондарды сұрыптап, жинақтап жөнетіп отырамыз. Тиімділігі сол, біз жылжымалы құрамдарды соңынан басына қарай, көбе сөккендей етіп, вагондарды ажыратып алуға өте ыңғайлы етіп құрастырып береміз, – дейді станция бастығы.
Ал енді жүк тасымалының жай-күйіне тоқталсақ. Бұрын тәуліктік орташа көрсеткіш 15-20 вагон болса, соңғы кездері бұл сан 30-35 вагонға жетті. Әсіресе, Түркістан халықаралық әуежайы салынып жатқан тұста, түркістандық теміржолшылардың жұмысы қауырт болған. Өңірде құрылыс жұмыстары әлі де қарқынды жүріп жатқандықтан, теміржолшылар жұмысы әлі де жеңіл емес. Демек, Түркістанның түрленіп, гүлденіп, өсіп-өркендеуіне теміржолшылар үлкен үлес қосып отыр деуімізге толық негіз бар.
Тағы бір атап өтетіні, түркістандық теміржолшылар еліміздің батыс аймағын су басқанда арнайы техникаларды тиеп, жөнелтуде әбжіл әрекет етіп, облыс басшылығының алғысына ие болды.
– Біздің жігіттері демалыссыз екі күн, екі түн аянбай еңбек етті. 27 вагонға 40 техниканы едел-жедел тиеп жібердік. Қауіпсіздік қағидаларын сақтай отырып, оны артып, байлау мен құжатын рәсімдеп, құрастырып, жолға салу бір-екі адамның қолынан келмесі анық. Өзге де мүдделес мекемелермен мәміле жасай отырып әрекет еттік. Сол кездері станцитяның 9 жолдан тұратын жаңа парк аумағында 400 дана платформа тұрды. Төтенше жағдай жарияланған сәтте арнайы техникаларды жедел тиеу үшін платформалар жан-жаққа таратылды. Кейін техникалар кері бағытта қайтқанда да сол платформаларды қадағалап, қабылдау мен орнына қайта жайғастыру жұмыстарын біздің жігіттер тиянақты орындады, - дейді станция бастығы Қадыр Қаңлыбайұлы.