Шиелі теміржолшылары жоғары көрсеткішке қол жеткізді

Шиелі – Батырхан Базарбаев басқаратын Қызылорда ЖТ бөлімшесінің оңтүстігіндегі іргелі станция. Бекеттегі теміржолшылар ауысыммен жұмыс жасау арқылы, станция басшылығының жұмысты тиімді ұйымдастыру тәсілінің арқасында, өздеріне бекітілген өндірістік жұмыстарды жоспардан асырып орындап келеді. Биылғы жылы да осындай қарқынмен жұмысты бастаған шиелілік теміржолшылар басшылықтың ұйымдастырушылық қабілетінің арқасында жоспардан тыс жоғары көрсеткіштерге қол жеткізуде.  

2025 жылдың алғашқы тоқсанында және сәуір айында шиелілік теміржолшылар жоспарды 102-253% аралығында асыра орындап, жоғары кәсіби деңгейлерін көрсетті. Жыл басынан бері станцияда пойыздық және маневрлік жұмыстар қауіпсіз әрі апатсыз жүргізіліп келеді. Бұл шиеліліктердің әр қайсысының бекітілген тапсырмаларын кәсіби деңгейде атқара білуінің нәтижесі.

Шиелілік теміржолшылар жыл басынан бергі уақытта пойыздық, маневрлік жұмыстар кезінде және кірме жолдарда жылжымалы құрамдардың қозғалыс қауіпсіздігінің бұзылуының ешқандай түріне жол бермеген. Станция бастығының орынбасары Нұрғали Әбжаппаров әріптестерінің басшылық бекіткен тапсырмаларды дер уақытында атқарып оларды сапалы орындап жатқанын жеткізді.

«Жалпы, біздің Шиелі станциясындағы теміржолшының бәрі өз кәсібін жан-жақты игерген, сенімді жұмыс істейтін кәсіби мамандар. Біз алғашқы тоқсанда 142 пойыздан 6234 вагонды ажыратып, 4999 вагонды тіркеп 122 пойыз құрастырдық. Бұл пойыздарды құрастыру жұмыстары кезіндегі станцияның пойыз құрастырушылары, парк кезекшілері, жүк қабылдап тапсырушылар, диспетчерлер жалпы теміржолшылардың барлығы өз үлесін қосып нәтижелі жұмыс жасады. Ал, сәуір айындағы өндірістік жұмыс көрсеткіштері де межеден асып түсті. Сәуірде бекітілген 588 вагонға жүк тиеу жоспары 600 вагонға жеткізіліп, меже 102 пайызға асыра орындалды. Осы айдағы 1420 вагонға есептелген вагон айналымы 3597 вагонға дейін жеткізіліп жоспар 253 пайызға жетті. Бұл да біздің теміржолшылардың озат тәжірибесі мен шыңдалған ерен еңбегінің қайтымды жемісі, сол үшін оларға алғысымды білдіремін», - дейді әріптестеріне разылығын білдірген басшы орынбасары Нұрғали Әбжаппаров.  

Сәуір айында ДСП жанындағы оператор К. Қилыбаев, тасымал құжаттарын өңдеуші С. Шалекеева, жүк қабылдап тапсырушы М. Орынбаева, тауар кассирі Р. Бижанова, станция кезекшісі Л. Смайлов, Б. Тұрсыманов және парк кезекшісі О. Қарамұрзаевтармен толығып, ерен еңбектің үлгісін көрсете білген. Бекет теміржолшыларының өндірістік жұмыстағы жоғары көрсеткіші – ұжымдық еңбектің жемісі.  

Станция теміржолшыларымен техникалық сабақтар және нұсқаулықтар тұрақты ұйымдастырылып, ауысым алдындағы дайындыққа ерекше көңіл бөлінеді. Бұл өз кезегінде қауіпсіздіктің жоғары деңгейде сақталуына ықпал етіп отыр. Станция басшылығының жұмысты тиімді ұйымдастыруы мен тәжірибелі мамандардан жасақталған шиелілік теміржолшылардың кәсіби дағдысы жоспардың талап деңгейінде орындалуына мүмкіндік жасауда. Дегенмен аса қауіпті аймақ саналатын теміржол бойындағы өндірістік, маневрлік жұмыстар сақтықты, қауіпсіздікті талап ететінін олар да әсте естен шығармақ емес. Жылжымалы құрамдардың қозғалыс қауіпсіздігін сақтауды арттыру мақсатында станция басшылығы әр бір теміржолшының талап деңгейінде жұмыс жасауын бақылап отырады.