Ақтоғай – теміржол тарландарының мекені
Абай облысы бойынша меншікті тілші
Семей және Алматы ЖТ бөлімшелерінің шекарасында орын тепкен, төрт бағытқа қызмет көрсететін Ақтоғай станциясы – жүк тасымалындағы әлеуеті зор, білікті мамандар қызмет атқаратын іргелі мекен.
Ақтоғай кентінің іргесі 1929 жылы Түрксіб құрылысы кезінде қаланып, кейіннен Қытай халық Республикасымен экономикалық байланыстарды күшейтуге байланысты үлкен әлеуетке ие болған еді. Станциядағы теміржол саласы ардагерлерінің айтуынша, 1960 жылдардың басында ұзындығы 310 шақырымды құрайтын Ақтоғай-Достық телімі салына бастағанымен саяси жағдайларға байланысты тоқтап қалып, тек 1990 жылы толық аяқталған. Ақтоғай осылайша шығыстағы негізгі теміржол торабына айналды.
1985 жылы Ақтоғай локомотив пайдалану депосының техникалық бақылау цехы ашылып, қырықтан аса білікті слесарьлар мен шеберлер жұмыла кірісіп, ең алғашқы 2 Т Э10Л-465 тепловозын дайындықтан өткізіп жолға шығарды.
Дәл осы жылдан бастап жүк және жолаушылар тасымалы процесі күрт арта бастады. Бүгінде ҚХР-мен арадағы сауда байланысын нығайтуда елеулі орны бар станция еліміздің экономикалық дамуына сүбелі үлес қосып келеді. Сол себептен де, екінші темір жол төсемі салынып, биыл пайдалануға берілмек.
«Бүгінде Ақтоғайдағы жүк тасымалдау жоспары бес есе өсіп отыр. Өндірістегі өсім жоғары. Мұның барлығы әлбетте кешегі ардагерлер мен бүгінгі білікті мамандардың қажырлы еңбегінің арқасы. Осы орайда Ақтоғай-Саяқ теміржолының пайдалануға берілгеніне биыл 40 жыл болса, Ақтоғай-Достық-Алашанкоу теміржолының қолданыла бастағанына 30 жыл толып отырғанын айта кеткен жөн. Осынау жылдар Ақтоғай теміржолшыларының қажырлы еңбегін, шүмектеп төккен терін айғақтайды», - дейді ақтоғайлық ардагер теміржолы, Аягөз ауданының Құрметті азаматы Сейітбек Ешмұратов.
Станцияда әр жылдары еңбек еткен ардагерлердің айтуынша, Түрксіб құрылысынан бергі аралықта 13 теміржолшы «Құрметті теміржолшы» төсбелгісімен марапатталыпты. Одан бөлек Ленин орденін иеленгендер бір төбе. Қызметтері жоғары бағаланған теміржолшылар кейінгі буын жастарға, теміржол бойындағы барлық еңбек адамдарына үлгі.
Ақтоғай өңіріндегі теміржол тарландарының өмір жолы бүгінгі ұрпақ үшін үлкен тарих екендігі белгілі. Осы орайда, қазақ теміржолының дамуына сүбелі үлес қосқан, станциядағы түрлі теміржол мекемелерінде қалтқысыз қызмет атқарған, бүгінде зейнеткерлікке шыққан ардагерлер еңбегіне тағы бір баға беріліп, биылғы мерейтойлы жылы ескерілсе дейді жергілікті теміржолшылар.