Өзбекстан 2025 жылға дейін 44 жаңа пойыз сатып алмақ
Өзбекстан 2023-2024 жылдары жоғары жылдамдықты төрт испандық Talgo пойызын алады, олар Ташкент-Бухар-Хиуа бағыты бойынша қызмет көрсетеді. Сондай-ақ "Узбекистон темир йуллари" мекемесі 34 электрмен жүретін және 6 дизельді пойызды сатып алмақ. Бұл туралы Самарқанда өткен Discovering Uzbekistan туристік конференцияда теміржол компаниясының өкілі Фозил Шәріпов айтты, деп хабарлайды Rail-news.kz Podrobno.uz сайтына сілтеме жасап.
Жүрдек пойыздар ежелгі Хорезмнің соңғы билеушісі әрі қолбасшы болған Жалолиддин Мангубердидің есімімен аталады. Әр пойыз 11 вагоннан тұрады, олар айына 71 мың адамды тасымалдайды деп жоспарланып отыр.
2023-2025 жылдар арасында 34 электр және 6 дизельді пойыз сатып алу жоспарда бар. Олар мына бағыттар бойынша жүреді:
• Ташкенттен Келес, Бекабад, Ходжикент, Ангрен, Жизақ және Гүлістан
• Самарқандтан Шахрисабз, Жизақ, Бухар және Карши
• Бухардан Хиуа мен Карши
• Нүкіс-Хиуа бағыты бойынша Науаи-Бухар, Термез-Сариосиё, Қоқанд-Әндіжан, Әндіжан-Ханабад, Наманган-Әндіжан.
Өзбек компаниясының өкілі өз сөзінің соңында шетелдік елшілерді осы мәліметті елдеріндегі компанияларға жеткізуге және оларды жаңа пойыздарды сатып алу бойынша тендерлерге қатысуға шақырды.
Сондай-ақ дипломатиялық корпус назарына Orient Silk Road Express – Орталық Азиялық Orient Express халықаралық туристік пойызы туралы ақпарат ұсынылды.