Германияда екі қабатты жаңа электр пойызы таныстырылды
Германияның солтүстігіндегі Любеке қаласында Stadler компаниясы жасап шығарған екі қабатты электр пойызы таныстырылды, деп хабарлайды Rail-news.kz.
Жаңа пойыздар 2023 жылдың көктемінен бастап Гамбург — Любек бағытындағы құрамаларды алмастыра бастайды. Stadler компаниясына дәл осындай 18 пойызға тапсырыс берілген, оның алғашқы төртеуі қазір сынақтан өтіп жатыр.
Сондай-ақ 2023 жылдың сәуірінен бастап бұл пойыздың бағыты Балтық теңізі жағалауына дейін ұзартылмақ.
Екі қабатты электр пойызының ұзындығы 105 метр және екі тіркемелі вагоннан тұрады. 405 отыратын орын қарастырылған, оның 38-і бірінші классты. Пойыздағы барлық кресло телефон қуаттайтын тоқ көздерімен қамтылған. Жалпы пойызға тұрып баратын жолаушыларды қосқанда 880 адам сияды.
Пойыздың көп бейінді аймағы қол арба, мүгедектер арбасына ыңғайлы етіп жасалған, оған қоса 36 велосипед сияды.