Қытайда туристік пойыздар көптеп шыға бастады
Қытайда туристік пойыздар жол жүру жайлылығы мен жылдамдығының арқасында танымал бола түсуде және туризм нарығын қалпына келтіруге септігін тигізіп жатыр, деп хабарлайды Rail-news.kz.
Осы жылдың 23 наурызынан бастап тағы бір туристік пойыз Ұлы Қытай қорғанының Цзюйонгуан бөлігіндегі гүлді ағаштардың арасымен қатынай бастады, деп жазды China Daily.
Сондай-ақ 6 сәуірде Шанхайдың Хунцяо вокзалынан Янцзы өзенінің көрікті мекендері мен көрші аймақтарын қамтитын алғашқы туристік пойызы жолға шықты, тур бес күнге созылады.
«Жүрдек туристік пойыздар саяхаттаудың жылдам, қауіпсіз және ыңғайлы жолы болып табылады», – дейді Шанхай қаласының тұрғыны Фан.
Қытайдың туристік агенттіктері халықтың сұранысын қанағаттандыру үшін туристік пойыздармен саяхаттауда әртүрлі саяхат пакеттерін ұсына бастаған.
China Railway Travel Service Group компаниясы да биыл алғашқы туристік пойызын іске қосты. 428 жолаушыға арналған бұл пойыз Пекиннен Цзянси, Фуцзянь және Аньхой аймақтарын сегіз күнде аралап, жүріп өтеді. Компания алдағы уақытта Сычуань, Тибет автономды ауданы, Қытайдың солтүстік-шығыс аудандарын қамтитын тағы бір туристік маршруттарды іске қоспақ.
Бейжіңдегі екінші шет тілдер институтының Қытай мәдениет және туризм академиясының доценті Ву Линюн туристік агенттіктерге пойыздарды барынша пайдалану үшін оларды көркем аймақтар, сауда орталықтары мен ойын-сауық орындарына көбірек баратындай етіп үйлестіруді ұсынды.