Оңтүстік Африканың Transnet Freight Rail (TFR) жүк тасымалдау операторы Салданья – Сайшен кен тасымалдау желісімен 700-ге жуық вагоны бар рекордтық пойызды жүргізді. Құрамның ұзындығы жеті жарым шақырымға жетті, деп хабарлайды Rail-news.kz.
Ұлттық көлік-логистика компаниясы Transnet құрамына кіретін оператордың мәліметінше, пойыз 696 бос кен вагонынан жасақталған. Бұл көрсеткіш бұған дейінгі рекордтан асып түсті. Бұған дейін, 2001 жылдың маусымында Австралияның BHP Iron Ore тау-кен компаниясы 682 вагоны бар, ұзындығы 7,353 шақырымдық пойызды жүргізген еді. Ол құрам Порт-Хедленд портына темір кенін жеткізген.
Жаңа рекордтық пойыз 17 қазанда Оңтүстік Африканың оңтүстік-батыс жағалауындағы Салданья портынан жолға шықты. Құрам бір тәулікке жетпейтін уақытта Солтүстік Кейп провинциясындағы кен өндіру аймағында орналасқан межелі пунктке жеткен. Бағыттың жалпы ұзындығы 741 шақырымды құрайды.
Құрамның қозғалысын қамтамасыз ету үшін 15 E сериялы электр локомотивтері мен 43 D сериялы гибридті локомотивтер пайдаланылған. Олар пойыз бойына бөліп орналастырылып, радиобасқарылатын үлестірілген тарту жүйесіне қосылған.
Бұл технология локомотивтердің тарту және тежеу күштерін үйлестіріп, пойыз құрамының бойында пайда болатын бойлық жүктемелерді шектеуге мүмкіндік береді. Ал пайдаланылған локомотивтердің нақты саны мен пойыздың жалпы массасы әзірге жарияланған жоқ.
