Италия «Бір белдеу, бір жол» бастамасынан шығатынын мәлімдеді
Италия үкіметі «Бір белдеу, бір жол» бастамасынан шығатыны туралы Қытайға ресми түрде мәлімдеді, деп хабарлайды Rail-news.kz.
Италия 2019 жылы аталған бастамаға қосылу туралы меморандумға қол қойған G7-дағы жалғыз ел болған еді. Осы жылдың 7 желтоқсанында ЕО – Қытай саммитінде Италия бұл бастамадан шығатынын хабардар етті.
2013 жылы бастау алған «Бір белдеу, бір жол» жобасының негізгі идеясы Ұлы Жібек жолы бойымен Қытайдың Азия мен Еуропаға сауда байланысын қалпына келтіру болатын. Сауда керуенінің соңғы нүктесі Италияға барып тірелген.
Италия үшін бұл бастамаға қатысу инвестиция тартуға және елдің экспорттық мүмкіндіктерін нығайтуға жағдай жасайды.
CNN хабарлауынша, 2022 жылы Қытайдан Италияға тауар экспортының көлемі 50,5 млрд АҚШ долларын құраған, ал 2019 жылы 33,5 млрд доллар болды.
Бұл ретте Қытайға итальяндық тауарлардың импорты 26,9 миллиард долларға дейін өскен. Ал, 2019 жылы ол 21,4 млрд доллар көлемінде болды.