Қытай темір жолдары биыл 1,86 млрд жолаушы тасымалдап, жаңа рекорд орнатты
2025 жылдың қаңтар–мамыр айлары аралығында Қытай темір жолдары (CR) 1,86 млрд жолаушы тасымалдады. Бұл 2024 жылдың алғашқы бес айымен салыстырғанда 7,3 %-ға артық және компания тарихындағы жаңа рекорд болып отыр, деп хабарлайды Rail-news.kz.
Қытайдың теміржол желісімен күн сайын орта есеппен 11 243 жолаушылар пойызы жүріп отырған — бұл да өткен жылмен салыстырғанда 7,5 %-ға көп.
2025 жылғы 1 мамырда тәуліктік жолаушылар ағыны 23 млн адамнан асып, рекордтық көрсеткіш тіркелді. Сол күні желіде 13 752 пойыз қозғалыста болған, бұл екі көрсеткіш те компания тарихындағы ең жоғарғысы.
CR деректері бойынша, 2025 жылдың қаңтар–мамыр аралығында 7,67 млн шетелдік жолаушы тасымалданған, бұл өткен жылдың сәйкес кезеңімен салыстырғанда 29 %-ға жоғары.
Қытай – Лаос темір жол бағыты бойынша жолаушылар тасымалы 124 мың адамға жетіп, 24,2 %-ға артқан.
Ал Гуанчжоу – Шэньчжэнь – Гонконг жоғары жылдамдықты магистралімен 12,579 млн жолаушы қатынап, өсім 16,7 %-ды құрады.
Аталған кезеңде 630 туристік пойыз сапарға шыққан. Бұл 2024 жылдың алғашқы бес айымен салыстырғанда 20,2 %-ға көп.