Болгарияда Skoda Group электропойыздары жолаушы тасымалдай бастады
Болгарияда Skoda Group компаниясы шығарған алғашқы электропойыздар өңірлік бағыттарда қатынай бастады, деп хабарлайды Rail-news.kz.
14 тамызда төрт вагонды сегіз құрам пайдалануға берілді. Алдағы күндері 2024 жылы тапсырыс берілген 20 пойыздың барлығы желіге шығарылады деп жоспарланып отыр.
Пойыздар Skoda Group-тың 7Ev (RegioPanter) платформасы негізінде жасалған. Олар 25 кВ айнымалы ток желісінде сағатына 160 шақырымға дейінгі жылдамдықпен жүре алады. Әр құрамда 333 орын бар.
Салонда мүмкіндігі шектеулі жолаушыларға, балалар арбасы мен велосипедтерге арналған арнайы орындар қарастырылған. Сондай-ақ пойыздар жолаушыларды ақпараттандыру және қауіпсіздік жүйелерімен жабдықталған.
Болгарияның Көлік және байланыс министрлігімен 20 пойыз жеткізу туралы келісім 2024 жылы жасалған. Кейін тағы бес құрамға опцион іске қосылды. 25 пойыздың жалпы құны, оның ішінде 15 жылдық техникалық қызмет көрсетумен 326,7 млн еуроны құрайды.
Пойыздар Чехияның Пльзень қаласындағы зауытта өндірілген. Қалған бес құрамды Болгарияға қыркүйекке дейін жеткізу жоспарланған.
