Тас көмір теміржолдағы жүк тасымалының негізгі бөлігі болып қалып отыр
2022 жылдың қорытындысы бойынша ҚТЖ-да көмір тиеу көлемі 106,7 млн тоннаны құрады, бұл жалпы теміржол көлігімен тасымалданған жүктердің 50%-ы, деп хабарлайды Rail-news.kz.
Қатты отын тиеу өткен жылға қарағанда 800 мың тоннаға артты. Қазақстан бойынша 74,3 млн тонна көмір тасымалданып, экспортқа 32,4 млн тоннасы тиелген.
Көмір тиеу көлемінің оң динамикасы биыл да байқалды. 2023 жылдың бес айында 44 млн тонна көмір тасымалданса, соның 30,8 млн тоннасы республика бойынша, 13 млн тоннасы экспортқа тиелген.
Бұл туралы «ҚТЖ-Жүк тасымалы» ЖШС маркетинг жөніндегі атқарушы директоры Вадим Копылов «Astana Minining Metallurgy» халықаралық тау-металлургиялық Конгресі шеңберінде өткен көмір өнеркәсібі форумында айтты.
«ҚТЖ әлеуметтік маңызды жүктер тасымалына ерекше көңіл бөледі. Жылыту маусымы кезеңінде компанияның көмір штабы күн сайын тасымалға мониторинг жүргізіп, тасымалдың үзілуіне жол бермеу бойынша жедел шаралар қабылдайды. Біз көмір кен орындарымен тығыз байланыста жұмыс істейміз. Күн сайын ҚР ИИДМ, әкімдік, көмір кен орындары өкілдерінің қатысуымен жиындар өткізіліп, соның барысында барлық мәселелер бойынша өзара келісімге келетін шешімдер қабылданды. Өткен жылыту маусымы көмір жеткізу тізбегінде әрбір бөлімнің ұйымдасқан жұмысының өте маңызды екенін көрсетті», – деді В.Копылов.
2022 жылы энергия ресурстарға сұраныс артқандықтан экспортқа шығарылатын көмір тиеу көлемі айтарлықтай өскені атап өтілді.
«Экспортқа бағдарлану республикаішілік тасымал мәселесімен тығыз байланысты. Біздің ойымызша, көмір тасымалы республика бойынша ең басты стратегиялық міндет болып саналады», – деді баяндамашы.
Атқарушы директордың айтуынша, биылғы негізгі тренд теміржол көлігі инфрақұрылымын тиімді пайдалану болып қала береді. Осы ретте тасымалды барынша молынан бағдарлаудың маңызы зор, бұл стратегиялық жүкті жеткізу уақытын қысқартып, көмірдің көп бөлігін тасымалдауға септік етеді.