Жол салатын техниканы жаңартып отыру маңызды – ардагер

Қазір локомотивтер мен вагондарды жаңарту бойынша Штадлер және басқа да шетелдік компаниялармен біріккен жұмыстар жүріп жатыр. Алайда, жол салатын техниканы жаңартуды естен шығармауымыз керек. Егер жолың нашар болса, жаңа пойыздан пайда жоқ, олар жоғары жылдамдықпен жүре алмайды. Бұл туралы темір жол ардагері Бақтарбек Жүнісов айтты, деп хабарлайды Rail-news.kz.  

Өткен аптада Астана жол дистанциясы 90 жылдық мерейтойын атап өтті. Мерекелік шараны тамашалауға аталған дистанцияда көп жыл еңбек еткен ардагерлер де келді. Жиын барысында ардагерлермен тілдесіп, дистанцияның кешегісі мен бүгіні жайлы әңгімелесудің реті келді.

Темір жол ардагері Бақтарбек Жүнісов аталған дистанцияға әрқашан үлкен көңіл бөлініп келгенін жеткізді. Бұрын бұл телім төрт жолдың торабы саналыпты. Атап айтсақ, Көкшетау, Атбасар, Қарағанды және Павлодар бағытындағы пойыздар жүрген.  

«Ол кезде он мыңға жуық вагон өтетін болса оның жұмысы жақсы деп есептелетін. Яғни, бұл дистанция тың темір жолының жүрегі іспеттес еді. Сол себепті жаңа техниканың барлығын осында бағыттайтын. Тағы бір атап өтерлігі, бұл дистанцияны қазақ темір жолының белді өкілдері басқарды. Сол себепті теміржолшылардың ұстаханасы саналды. Бұл жерден шыққан мамандар өзге өңірлерге басшылық қызметке аттанатын», – деп еске алады ардагер теміржолшы.  

Сонымен қатар ол, бұрынғы кезде пойыз ағыны қазіргіден жоғары болғанын және жыл сайын салынатын жол көлемі де едәуір көп болғанын атап өтті. Соған қарамастан жолшылар берілген уақытта жолдарды салып үлгеріп оытрыпты. 1980 жылдары станциялардың барлығы модернизацияланып, кеңейтілген. Шикізатты тасымалдайтын жүк пойыздары үшін қосымша жолдар салынып, соның арқасында жоғары көрсеткіштерге қол жеткізіпті.

Ардагер сөз арасында локомотив, вагондармен қатар жол  салатын техникаға да көңіл бөліп, оларды ауыстырып отыру қажеттігін айтты. Жаңа пойызды алған кезде, жол салатын техникаларды да жаңартып отыру қажет деген ойда ақсақал.

«Жолсыз ешқайда бара алмаймыз. Алдымен жол, одан кейін жылдамдық керек. Егер жолың нашар болса жаңа тепловозды алғаннан пайда жоқ, олар көрсетілген жоғары жылдамдықпен жүре алмайды. Сол себепті алдымен инфрақұрылымды жөнге салу керек, оны жөндейтін техникаға көңіл бөлу керек. Біздің қолдағы техниканың алдыңғысына 70 жыл болса, соңғысының өзіне 50 жыл болып қалған. Мәселен, Қытай темір жол саласында неліктен алдыға шығып кетті дейсіз?, олар техникаға мән берді, соған күш салды. Қазір олардың жолы сағатына 350 шақырым жылдамдықпен жүруге қауқарлы», – дейді теміржолшы.  

Жиын барысында Астана ПЧ бастығы Дәурен Қабас дистанцияның атқарып жатқан жұмысына тоқталды. Айтуынша, биыл 800 км астам жолға 550 жол монтер қызметі көрсетілген.