Әкенің аты балаға мың жылдық азық
Алманхан теміржолдың торабы саналатын Шу қаласында туған. Әкесі Ақыл вагон депосында еңбек еткен екен. Туған ағасы Балтабек те осы вагон депосында еңбек жолын бастапты. Сондықтан әкесі мен ағасына ілесіп депоға жиі баратын бала Алманханды теміржолшылар түгел танитын. Мектеп бітіре сала локомотив депосына слесарь болып жұмысқа кіргенде «Сен Ақылдың ұлысың ба?» дейтін үлкен-кіші.
«1978 жылы аттестатымды қолыма ала сала, локомотив депосына құжаттарымды өткіздім, слесарь іздеп жатыр екен. Барлығы таныс, адамдар да, жұмыс та, қаланың адамдары, әкем мен ағамның таныстары. Олар маған қолдау көрсетіп, білмегенімді үйретті, қамқор болды. Шаруаға тез бейімделіп кеттім. Бертінге дейін мені баласынатын үлкендердің көзі кеткенше «Ақылдың ұлы» деген жанама аттан құтылған жоқпын», – деп күліп еске алады Алманхан Жылқыбаев өткен күндерін.
Отан алдындағы борышын абыроймен өтеп келген жас жігіт туған жерге оралған соң да мамандығын өзгертуді ойлаған жоқ. Бірақ уақыт өте келе білім алу қажет деп түсініп, Алматы теміржол техникумына барып, құжат тапсырады. «Емтихан түк те қиынға соққан жоқ. Аз уақыт болса да тәжірибемен шыңдалғанмын ғой. Түстім де кеттім білім ордасына. Теміржол саласының теориясын үш жыл оқыдым. Ұстаздарым маған ештеңе үйрете алған жоқ деуден аулақпын. Әр мамандықтың ұқыр-шұқыры, күрделі жақтары болады. Соларды біршама меңгере түскенмін. 1985 жылы дипломымды алған соң, Шу локоматив депосына тағы келдім. Басшылар мені құшақ жая қарсы алды. Міне, содан бері қырық жылға таяды, осы жерде тапжылмай еңбек етіп келемін», – дейді теміржолшы ағамыз. Бүгінде Алманхан Жылқыбаев – депоның шаруашылық жөніндегі шебері. Әр ісіне жауапты, тиянақты, мұқият зерделеп барып шешім қабылдайды. Көп жылғы тәжірибесі бола тұра, асығыстыққа жол бермейді. Теміржолшы әкесі Ақыл ілгеріде қайтыс болған, ағасы Балтабек вагон депосынан зейнетке шығыпты. Ал өзінің локоматив депосында еңбек етіп жүргеніне 43 жыл болыпты. Енді үш жылдан соң ол да құрметті еңбек демалысына шығады. Жары Қалия да теміржолдан алыс емес. Осы локомотив депосының жоспарлау бөлімінде жұмыс істеді. Екі қызы бар. Біреуі әке-шеше кәсібінен алыс кетпей, Алматыдағы теміржол академиясын бітіріп, қазір осы салада қызмет етіп жүр.
«Қайтсін енді, мен секілді, көзін ашқаннан көргені теміржол. «Алма сабағынан алыс түсе ме?!» дейді Ақылдың ұлы Алманхан.