Жол картасы: қауіпсіздік деңгейі артуда
«Қазақстан теміржолшысы» газетінің тілшісі
«Қазақстан темір жолы» ұлттық компаниясында темір жолда мүліктің сақталуы мен қауіпсіздігі деңгейін арттыру жөніндегі Жол картасын іске асыру мәселесіне қатысты кеңес өтті. Қозғалыс қауіпсіздігі департаментінің директоры Марат Шакенов жетекшілік еткен жиынға ҚР ІІМ-нің Көліктегі полиция департаменті өкілдері қатысты.
Жол картасы аясында ауқымды шаруалар атқарылған. Айталық, Алматы-1 және Алматы-2 вокзалдарының перрондарына полицияның жедел пункттері орнатылып, барлық бағдарларда қатынайтын жолаушылар пойыздарындағы вагон-мейрамханаларда және вагон-барларға жолаушылар қауіпсіздігі үшін бейнебақылау камералары қойылған. Тасымалданатын жүктердің сақталуын қамтамасыз ету және құқық бұзушылықтарға қарсы іс-қимыл жасау үшін теміржол станциялары мен вокзалдар қосымша бейнебақылау камераларымен жарақтандырылмақ. Бейнежазба полиция бөлмелеріндегі мониторларға келіп түсіп, дерек 30 күнге сақталады.
Көліктегі полиция өкілдері вокзалдардан жолаушылардың қол жүктерін арнайы аппарат арқылы тексеріп өткізу оң нәтижесін беріп, қауіп-қатердің алдын алуға септігін тигізіп отырғанын атап өтті. Алайда, вагондардың барлығы бейнекамерамен толық жабдықталмағандықтан, кейбір заң бұзушылық әрекеттер дәлелсіз қалып жатқанын, сондықтан осы мәселені оң шешу жағын қарастыру қажеттілігі айтылды.
ҚТЖ өз кезегінде локомотивтердің шұғыл тежеу қолданғанын, кестеден тыс аялдауын және жазатайым оқиғаларды тіркеу үшін сыртқы және ішкі бақылау бейнетіркегіштерімен жабдықтауды жалғастыруда. Қазіргі уақытта бейнебақылау жүйесі 347 локомотивте орнатылып, жұмыс істеп тұр. Тағы бір атап өтерлігі, еліміздің зауыттарында құрастырылып жатқан локомотивтер бейнебақылау жүйесімен жабдықталған.
Сонымен қатар ұлттық компанияда тасымалдау процесінің тиімділігін және магистральдық желіде пойыздар қозғалысы қауіпсіздігінің деңгейін арттыру үшін «Цифрлық шеңбер» жылжымалы құрамды бақылау жүйелерінің ауқымды жобасы іске асырылуда. Осыған орай, Қарағанды-Сұрыптау, Жаңаарқа, Арыс, Қандыағаш және Локоть станцияларында лазерлік құрылғыларды, лидарлар мен өлшеу аспаптарын қолдана отырып жүктердің жай-күйін анықтауға, бейнебақылау жүргізуге мүмкіндік беретін рамка орнату жоспарлануда. Ал станцияларда келіп және кететін вагондардың тұтастығын бақылауды жүзеге асыратын қолданыстағы 40 кешенді жаңғырту көзделіп отыр. Сондай-ақ пойыздар қозғалысының қауіпсіздігіне әсер ететіндіктен, вагондарға шамадан тыс жүктің тиелуіне немесе жүктің жетіспеуіне жол бермеу үшін Риддер, Аягөз, Шу, Шымкент, Түркістан, Дегелең, Алматы-1, Шиелі, Шетпе, Өзен, Павлодар, Тобыл, Қостанай, Алтынкөл, Сарыағаш, Ганюшкино және Шарбақты станцияларының парктерінде жылжымалы құрамды өлшеу үшін вагон таразылары орнатылған.
Теміржолда адамдар мен малға соқтығысу оқиғаларының санын азайту үшін профилактикалық іс-шаралар белсенді жүргізілуде. Мәселен, бүгінгі күнге дейін 540-қа жуық тыйым салатын ескерту белгілері жаңартылса, осы жылдың соңына дейін тағы да 209 белгі жаңартылмақ. Сонымен қатар жыл сайын темір жолдарға малдың шығуына тосқауыл болатын 1000 км жол бойына қоршау құрылғылары орнатылып келеді. Теміржолда қоғамдық тәртіп пен қауіпсіздік деңгейін арттыру бағытында теміржолшылар мен тәртіп сақшылары алдағы уақытта да бірлесе жұмыс істеуге келісті.