Тарихи жәдігерлер сыр шертеді
"Қазақстан теміржолшысы" газетінің Жамбыл облысындағы меншікті тілшісі
Осыдан 5 жыл бұрын Жамбыл ЖТ бөлімшесінде мұражай ашылғанда оның Ұлы Отан соғысы кезеңіне арналған бөлімін негізінен Жамбыл локомотив пайдалану депосындағы музейдің жәдігерлері құраған.
«Күркіреп күндей өтті ғой соғыс...» демекші, қанды қырғын жылдардан естелік шерткен белгілер қазір музейдің төрттен бір бөлігін алып тұр. Мұндағы ең құнды жәдігерлердің біразын даңқты қолбасшы, Кеңес Одағының батыры И.В.Панфиловтың қызы Валентина Панфилова әкеліп тапсырған.
Медициналық қызмет дивизиясының лейтенанты Валентина Ивановна И.В.Панфилов атындағы 8-ші гвардиялық дивизия құрамында соғысқа қатысқан. 1944 жылы басынан жарақат алып, Рига түбінде демобилизацияланған майдангердің алған наградалары осы бұрышта сақтаулы. Ал Жамбыл локомотив депосындағы музейде даңқты қолбасшы И.В.Панфиловтың суреттері мен құжаттары бар.
Музей меңгерушісі Венера Букенованың айтуынша,тағы бір құнды жәдігер – ТЧЭ-31 Жамбыл локомотив депосының машинисі Валентин Филлипович Захаровтың майдан даласында кезекті бір шабуыл кезінде жау танкісінен жұлып алған айнасы. Бұл жәдігерге мұқият қараған адам айнаның бір шетіне «Вермахт» белгісі сызылып салынғанын көре алады.
Валентин Филиппович ҰОС-да бронетранспортер, танкке қарсы қолданылатын қарулар ротасының командирі болған. Кейін елге келіп, еңбек майданына оралғанда да бұл айнаны жүк қоржынынан тастамай алып жүріпті. Ал локомотив депосында музей ашылғанда арнайы әкеліп тапсырған.
– Жалпы Жамбыл локомотив депосындағы музей – теміржолдағы ең көне мұражайдың бірі. Ғасырлық тарихы бар депоның музейіне биыл 51 жыл толып отыр, – дейді Венера Букенова.
Деподағы музейдің де үлкен бөлімі Ұлы Отан соғысы кезеңіне арналған. Бұлай болуы да заңдылық. Себебі соғыс жылдарында деподан 200-ден астам машинист майданға аттанған. Олардың ішінде елге аман келгендері кейін өздерінің жауынгерлік гимнастеркаларын, сарбаз белдіктерін, майданнан жазған хаттарын музейге өткізген. Жәдігерлер қатарында оқ тескен шлемдер де бар.
