Бір жәдігердің тарихы
"Қазақстан теміржолшысы" газетінің Жамбыл облысындағы меншікті тілшісі
Жамбыл жол бөлімшесіндегі музейде Ұлы Отан соғысы жылдарынан қалған жәдігерлер аз емес. Солардың ішінде ертеректе майдангер-машинист әкеп тапсырған неміс танкісінің айнасы келушілердің назарын аудармай қоймайды.
Қабырғаның төрттен бір бөлігінде жауынгерлердің теміржол бойымен кезекті шабуылға шығып бара жатқан сәтінен көрініс беретін үлкен картина банері ілінген. Кіріп келгенде қара түсті бояумен салынған тұтас бір полотно секілді әсер қалдырады. Ал теміржолшылардың майдан даласынан әкелген жол қапшығы, оқ-дәрілердің түр-түрі әйнекпен қапталып, мөрленіп-жабылған екі ұзын сөреде сақтаулы тұр.
Ұлы Отан соғысында жеңісті жақындатуға теміржол мен теміржолшылардың қосқан үлесі өте зор. Сондықтан Жамбыл жол бөлімшесінің музейіндегі соғыс тақырыбына арналған бұрыш көпшіліктің назарында. ТЧЭ-31 Жамбыл локомотив пайдалану депосында еңбек еткен майдангер-машинист Валентин Филлипович Захаров тапсырған неміс танкісінің айнасы жайлы әңгімені тыңдаушылар қатары да азайған емес. Жауынгердің жол қапшығында жүріп беті әбден сырылған айнаның шетінен «Вермахт» белгісі әлі өшпеген.
Ұлы Отан соғысы жылдарында фашистердің «Тигр» (Tiger), «Пантера» (Panther) деген танктері туралы білеміз. Деректерде бұл танктер майдан даласына 1943 жылы келе бастағаны жазылған.
Оған дейін Кеңес әскерінің 45 миллиметрлік танкіге қарсы зеңбірегі сенімді қару саналған екен. Қарсы жақтың танкілерін бұйым құрлы көрмей, істен шығарып отырған. Ал майдан даласына «Тигр» мен «Пантера» танкілері келгеннен кейін жарамсыз болып қалған. Міне, бұл – сол немістің атақты «Тигр» танкісінің айнасы екен.
– Кезекті шабуыл кезінде кеңес жауынгерлері жау танкісін істен шығарып олжалаған айнаны өзімен бірге сонша жыл жолқапшығында тасып, елге де ала келген Захаров оны кейін локомотив кабинасына іліп қойып, талай жыл пайдаланған көрінеді. Тек зейнетке кетерде музейге тапсырып кетіпті, – дейді мұражай меңгерушісі Венера Букенова.
Валентин Филиппович ҰОС-да бронетранспортер, танкке қарсы қолданылатын қарулар ротасының командирі болған. Елге оралған соң ұзақ жыл машинист болып еңбек еткен.
