ҚТЖ филиалдарында «Полиэтиленді пакетсіз күн» акциясы өтті
«Қазақстан теміржолшысы» газетінің тілшісі
«ҚТЖ» ҰК» АҚ – Магистральдық желі дирекциясының құрылымдық бөлімшелері мен филиалдарында қараша айында «Полиэтиленді пакетсіз күн» акциясы өтті. Оның мақсаты бір реттік пластикті шамадан тыс тұтыну мәселесіне назар аудару, полиэтиленнің қоршаған ортаға және адамдарға зиянды әсерін ескерту болды.
«Полиэтиленді пакет қысқа мерзімге ғана пайдаланылып, қоқысқа тасталуы керек. Ал оны жақсаң, улы диоксин және басқа да зиянды заттар бөлінеді. Адам жыл сайын төрт жүзге жуық полиэтилен пакеттерін пайдаланады екен. Бұл қала маңындағы қоқыс орындарының 35 пайызы осы қалдықтармен толтырылады деген сөз. Ал біздің акциямыз, бұл күні полиэтилен пакеттерін матадан тігілген сөмкеге немесе жіптен тоқылған қапшыққа ауыстырып, халыққа пайдалы әдетке дағдылануды үйрету», – дейді дирекцияның экологиялық қауіпсіздік бөлімінің бастығы Айгүл Иримбетова.
Оның айтуынша, өңірлік және желілік деңгейде кездесулер өткізіліп, онда полиэтиленнің қоршаған ортаға теріс әсері туралы презентация көрсетіліп, оны пайдалануды тоқтатып, қағаз пакеттерді немесе эко пакеттерді тұтыну насихатталыпты. Сонымен қатар «Полиэтиленсіз күн» экологиялық акциясы аясында акцияның тақырыбы мен мақсаты көрсетілген аншлагтар ілініп, ақпараттық тақырыптық кездесулер өткізілген және магистральдық жолдар полиэтилен бөтелкелері мен полиэтилен пакеттерінен тазартылыпты.
Бұл күні теміржол магистралінің еңбеккерлері акцияға белсенді қатысып, қызықты іс-шаралар өткізген. Мәселен, Қостанай НЖС қызметкерлері тарапынан Қостанай вокзалында жолаушыларға сауалнама жүргізіліп, оның қорытындысы бойынша қоршаған ортаға зиян келтіретін полиэтилен пакеттердің, қаптамалардың, бөтелкелердің қауіптілігі туралы хабардар ету қажеттілігі, сонда ғана адамдар бұл мәселенің маңыздылығы туралы ойлана бастайтыны анықталған. Ал Илецк темір жол учаскесі филиалы бойынша сурет байқауы ұйымдастырылып, оған филиал қызметкерлерінің балалары қатысқан. Балалар топырақты уландыратын, табиғатты ластайтын, ұсақ жануарлар мен құстарды жойып жіберетін полиэтиленнің зияны туралы мағлұматтарды қылқаламға арқау еткен. Осы еңбектері үшін кәсіподақ ұйымы тарапынан тәтті сыйлықтармен марапатталыпты. Сондай-ақ ата-аналар мен балалар қағаз немесе матадан тігілген пакеттер алып, дүкендерде сауда жасапты. Ал Алматы НЖС қызметкерлері өндірістік учаскелерде пластикалық бөтелкелер мен полиэтиленді пакеттерді жинап тазарту жұмыстарын жүргізсе, Жамбыл НЖС-ке қарасты Түлкібас жол дистанциясының экологы Гүлсина Анарбаеваның анасы қызының акция күніне арнап арнайы матадан сөмке тігіп берген.