Магистральдық желі дирекциясында табиғатты қорғау акциясы жүріп жатыр

Магистральдық желі дирекциясында «Батарейканы тапсыр да, кірпіні сақтап қал» акциясы өтуде. Акция әрбір адамның экологиялық мәдениетін арттырып, қоршаған орта қауіпсіздігіне өз үлесін қосуын көздейді. «Жобаның идеясы – ҚР Экологиялық заңнамасын басшылыққа ала отырып, Магистральдық желі дирекциясының барлық кәсіпорындарында батарейкалар- ды жою бойынша жүйені құру. Сондай-ақ, Дирекция қызметкерлері арасында қауіпті қалдықтар қатарына жататын батарейкаларға жеңіл-желпі қараудың теріс әсерлері туралы, оларды сауатты жою қажеттілігі туралы ақпаратты кеңінен тарату», – дейді Дирекцияның Өнер- кәсіптік қауіпсіздік және экология департаментінің бас менеджері Қуанышбек Қосымов. Магистральдық желі дирекциясының құрамына 125-тен астам кәсіпорын кіреді, және оларда батарейкаларды бір жерде жинау үшін контейнерлер орнатуға, сосын оларды әрі қарай жою бойынша жұмыстар жүргізіліпті. Департамент өкілі, батарейкаларда адам үшін аса қауіпті литий, никель, қорғасын, кадмий, сынап сияқты металдардың көп мөлшері бар екенін айтады. Мәселен, никель дерматитке әкелсе, кадмий адамның өкпесі мен бүйрегін зақымдайды екен, ал уытты сынап буы ми мен жүйке жүйесіне әсер етеді. Жалпы, ғалымдардың зерттеулеріне сүйенсек, бір батарейканың өзі екі ағаш өсетін, 1 кірпі, екі көртышқан, бірнеше мың жауын құрты өмір сүретін кеңістікті уландыруы мүмкін. Ал қоқыс орындарынан аққан ластанған сумен және ауамен бірге зиянды заттардың үйлерімізге де еніп жататыны кәміл. Бір қарағанда, бұл проблема үлкен болып көрініп, біздің қолымыздан ештеңе келмейтін сияқты әсер етуі мүмкін. Алайда, үлкен проблемалар кішкентай түйткілдерден бастау алады. Ал кішкентай проблеманы жою кім-кімнің болсын қолынан келеді дейді мамандар. Батарейканы кез келген жерге емес, тиісті контейнерлерге тастау арқылы қоршаған ортаны қорғау мүмкіндігі бар.