Жылыту маусымы басталғалы ҚТЖ желісімен 54,3 млн тоннадан астам көмір тасымалданды
2025-2026 жылдардағы жылыту маусымының басынан бастап (мамырдан 19 қаңтарға дейін) ҚТЖ желісі бойынша республика ішінде 54,3 млн тоннадан астам көмір тасымалданды, бұл өткен жылыту маусымының ұқсас кезеңі көрсеткіштерінен 2,6 млн тоннаға артық, деп хабарлайды Rail-news.kz.
Оның ішінде жылу электр орталықтарына (ЖЭО) 49 млн тонна көмір тасымалданды, бұл өткен маусыммен салыстырғанда 3,2 млн тоннаға артық. Коммуналдық-тұрмыстық секторға теміржол көлігімен 5,3 млн тонна көмір жеткізілді.
Мемлекеттік органдардың ақпараты бойынша, мамырдан 19 қаңтарға дейін өсіп келе жатқан қажеттілік жоспары 5,4 млн тонна қатты отынды құрады, бұл ретте 7,2 млн тонна, яғни жоспарлы қажеттіліктен 34% артық дайындалды. Көмір операторлары қоймаларында коммуналдық-тұрмыстық қажеттіліктерге арналған шамамен 435 мың тонна көмір жинақталған.
Қазақстан Республикасы Энергетика министрлігінің алаңында көмір тасымалдауды үйлестіру мақсатында тұрақты негізде “ҚТЖ” ҰК” АҚ, жергілікті атқарушы органдар мен көмір өндіруші кәсіпорындар өкілдерінің қатысуымен Республикалық штабтың кеңестері өткізіледі.
Жалпы, жылжымалы құраммен көмір тасымалдауды қамтамасыз ету және шарттық жеткізілімдерді орындау мәселелері әкімдіктер тарапынан да, көмір разрездері тарапынан да туындамауда.
Энергия кәсіпорындарына және Қазақстан Республикасы тұрғындарын қамтамасыз ету үшін көмір тасымалдау ерекше бақылауда. ҚТЖ жедел штабының жұмысы тұрақты режимде жүзеге асырылады.