Еңбек қауіпсіздігі – жаңа форматта

Ақтөбе жүк тасымалы бөлімшесінде еңбек қауіпсіздігі апталығы өтті. Жаңа форматтағы шарада цифрлық технологиядағы жаңашылдықтарды қолданды.  

Апталық алғаш рет дөңгелек үстел форматында ұйымдастырылды.  Бір минут үнсіздікпен басталған шара ауқымды өтіп, әр станциядағы қауіпсіздікке жауапты қызметкерлерден бөлек Астана қаласынан тікелей байланыс қосылды. Еңбек қауіпсіздігі департаменті директорының міндетін атқарушы Асқар Берлік сөз сөйлеп, еңбек қауіпсіздігі саласында жаңа әдістер мен цифрлық технологияларды енгізу – жұмысшылардың қауіпсіздік ережелерін жақсы меңгеруіне және жазатайым оқиғалардың алдын алуға көмектесетінін ерекше атап өтті.

Іс-шараға теміржол саласының мамандарымен қатар ТЖД, Ақтөбе облысының еңбек инспекциясы және медициналық қызмет өкілдері қатысты. Бұл жиынның ерекшелігі – заманауи технологияларды қолдану болды. Еңбек қорғау жетекші инженері Бақытнұр Ермекова жасанды интеллект арқылы техникалық сабақ көрсетіп, қатысушыларға қауіпсіздік ережелері мен жадынамаларды QR-код арқылы ұсынды. Сонымен қатар қауіпсіздік мәдениетін қалыптастыруға бағытталған логикалық ойындар ұйымдастырылып, қатысушылардың белсенділігі артты.

«Еңбек міндеттемелеріне жауапкершілікпен қарау маңызды. Өндірістік оқыту шеберлерімен апатты жағдайларды болдырмауға қатысты сабақ ұдайы өтеді. Өткен жылы Орал және Ақтөбе бөлімшелерінде төтенше жағдай болмады. Ал 2023 жылы тіркелген оқиғалар бар. Біз олардан сабақ алып, есімізден шығармау абзал», – деді бас инженер Жасұлан Рысқалиев.  

Дөңгелек үстелде ChatGPT-ді өндірісте қолдану көрсетілді. Инженердің айтуынша, бұл әдістер жұмысшыларға ақпаратты жеңіл әрі түсінікті жеткізуге көмектеседі. Цифрлық форматтағы жадынамалар мен интерактивті оқыту тәсілдері қауіпсіздік ережелерін есте сақтауды жеңілдетіп, оларды күнделікті тәжірибеде қолдануға мүмкіндік береді.

Сонымен қатар ТЖД қызметкерлері мен 103 қызметінің мамандары баяндама жасап, оқыс жағдайда алғашқы медициналық көмек көрсету тәсілдері көрсетілді. Өзін жайсыз сезінген адамға дем беру, ең бірінші қандай әрекет жасау керектігі айтылды.

Шара соңында қатысушыларға еңбек қауіпсіздігі тақырыбындағы стикерлері бар естелік сыйлықтар тарту етілді.