ҚТЖ елдің шығысындағы темір жолды жөндеу бойынша жол картасын әзірледі
«ҚТЖ» ҰК» АҚ-да 2022-2024 жылдарға арналған «ҚТЖ» ҰК» АҚ – «Семей магистральдық желі бөлімшесі» филиалы шекарасында темір жолдарды жөндеу бойынша жол картасы әзірленді, деп хабарлайды Rail-news.kz.
Жол картасы аясында пойыздар қозғалысы қауіпсіздігін арттыру үшін Өскемен-1 – Алтай учаскесіндегі теміржол төсемін жаңғырту қарастырылған.
«Бүгінгі таңда аталған учаскеде алғаш рет УК-кранды қолдана отырып, 5,93 км темір-бетон шпалдарында күшейтілген орташа жөндеу және 2,2 км-де орташа жөндеу жүргізілді. 8 мыңнан астам жаңа ағаш шпал салынды. Бес станцияда «Жейсмар» машинасының көмегімен 1100-ден астам ескі жарамды темірбетон шпал төселді. Пойыздардың бірқалыпты қозғалысын қамтамасыз ету үшін 7 қисық учаскеде радиус ұлғайтылды», – делінген ҚТЖ баспасөз қызметі таратқан мәліметте.
Осы жылдың соңына дейін Өскемен - 1 – Алтай желісінде 19 шақырымнан астам жол күшейтілген орташа және орташа жөндеумен қамтылады. Темір-бетон негізіне көше отырып, жолды күшейту жөніндегі жұмыстар кейінгі жылдары да жалғасатын болады.