Ақтөбеде айналма жол салына ма?

Ақтөбе қаласының 2050 жылға дейінгі даму жоспары бекітілді. Өңірдің Бас жоспарында тоғыз жолдың торабындағы қалаға 40 шақырымдық айналма темір жол салу жобасы бар.  

Қаланың даму жоспарына кірген жаңа темір жол жобасы өңірдегі айналма автожолдың батыс жағынан өтеді деп жобаланған. Сонымен қатар қаланың қоныстану аумағы арқылы өтетін темір жол бойында рельсті жолаушылар көлігі желісінің құрылысы жоспарланған. Жолаушылар рельсті көлігінің жүру жолдары бойында ЖРТ желісіне қызмет көрсету үшін инфрақұрылымдық объектілерді – аялдамалар, тосқауыл қою автотұрақтары, трамвай депосы және т. б ұйымдастыру көзделген. БААҚД – Ақтөбе айналма автожолының бойында салынатын айналма теміржолдың ұзындығы 40,0 км құрайды.  

Сонымен қатар Ақтөбенің бас архитекторлары бекіткен құжатта бұған дейін айтылып жүргендей, Орал қаласына дейін тікелей теміржол тармағын салу ұсынылады. Сонда бүгінгідей Ресей Федерациясының аумағынан, Соль Илецк арқылы өтпей, яғни бөтен елдің территориясы арқылы шекаралық, кедендік тексеру, басқа да кедергілерсіз қатынау мүмкіндігі туады. Болашақ теміржол желісінің батыс бөлігін қолданыстағы республикалық маңызы бар жүрдек автомагистральға параллель төсеу ұсынылады. Ресей шекарасынан тыс Ақтөбе мен Оралды тікелей жалғайтын тармақтың  ұзындығы 10,0 км құрайды.

«Ақтөбе қаласының 2050 жылға даму жоспарында «Мәртөк-Қобда-Шыңғырлау» темір жолын салу туралы айтылады. Бұл жол Ресей темір жолына тәуелді болмау үшін көрші ел шекарасын айналып өтеді. Бұл  «Хромтау-Алтынсарин» темір жолы секілді болады. 256 км болатын темір жол салу жоспарының қай жылғы бюджет қаржысымен жүзеге асатынын қазір тап басып айта алмаймыз», – деді Ақтөбе облыстық құрылыс басқармасының сәулет және қала құрылысы бөлімінің басшысы Айбек Жұмабекұлы.

Ақтөбе қаласы – Қазақстанның солтүстік бөлігіндегі аса ірі көлік тораптарының бірі. Орталық Азия мен Қазақстанның оңтүстік-шығыс бөлігін Батыс Қазақстан өңірлерімен, Оралмен, Ресейдің еуропалық бөлігімен және Еуропа елдерімен байланыстыратын республикалық маңызы бар автомобиль және теміржол көлік магистральдарының бойында орналасқан. Қаланың Бас жоспарында әлеуметтік-экономикалық дамуының қысқа мерзімді және ұзақ мерзімді бағдарламаларын, тыныс-тіршілікті қамтамасыз ету жүйелерін, инженерлік және көліктік инфрақұрылымды дамыту кезеңдері көрсетілген.