Жолдарды жөндеу барлық технологиялық талапқа сай

Атырау магистральдық желі бөлімшесі бойынша биыл 69,642 шақырым жол күрделі жөндеуден өтуі тиіс. Өткен аптада Ганюшкино – Атырау учаскесіндегі 15-разъезд – Аққыстау станциясы аралығында 6 сағаттық толаскезде соның алғашқы шақырымын төсеу жұмыстары басталған. Бүгінде учаскедегі жұмыстар толық аяқталды.

– Рзд15 – станция Аққыстау – рзд Бақсай аралығында жоспарға сай 19,678 жол күрделі жөндеуден өтіп, құрылыс толықтай аяқталды. Мердігер – «Интегра Констракшн» ЖШС. Аталған участокта бұрынғы ағаш шпалдар түгел алынды. Әуелі жаңа мен ескінің түйіскен тұсы тазаланып, бұрандалары ағытылды. Кранмен ескі рельс шпалымен қоса жерден көтеріліп алынды да, бос вагонға жиналды. Ал тракторлар рельсі алынған жолды жыртып, сосын тегістеп, салмақпен нығыздап, жолды жаңа темірбетонды шпалдар төсеуге әзірледі. Жер төсемі дайын болғаннан кейін, қиыршық тас төсеу, жерді нығыздау, басқа да жұмыстар технологиялық талаптарға сай жасалды, – дейді Атырау жол дистанциясының бастығы Самат Боздақов.  

Құрылыс барысында ауыр жүктерді, яғни темірбетонды бұрмаларды, бағаналарды, шпалдарды, ауыр техникалардың қосалқы бөлшектерін көтеріп-түсіруге КЖ-562 маркалы краны пайдаланылып, күрделі жөндеу жұмыстары кезінде ДУАМАТ, Унимат, ДГС, ПБР, ВПРС, т.б. машиналар да қолданылған.  

Қазіргі уақытта ст.Жамансор – рзд 377 – ст. Мақат аралығында жоспарда белгіленген 22,7 шақырымның 8 шақырымына күрделі жөндеу жүргізілген. Сонымен қатар Мұқыр – Жантерек – Кенбай аралығында 22,20 шақырым жолды жөндеудің күрделі түрінен өткізу де биылға жоспарланған. Бірақ өңірде соңғы кезде жауын-шашынның үдеп кетуіне байланысты құрылысшылардың аз-маз кідіріп тұрған жайы бар. Ал жол сапасы жақсаруының нәтижесінде жолаушылар пойызының жылдамдығы 60км/ сағ-120км/сағатқа, жүк тасымалы пойызының жылдамдығы 50км/сағаттан 100км/сағатқа көтерілмек. Күрделі жөндеуден өткен жолдарда енді жолаушы пойыздарына – 120, Тальгоға – 140, ал жүк пойыздарына 100 шақырымға дейін жылдамдыққа рұқсат етіледі. Күрделі жөндеу жұмыстары барысында мердігер компания күндіз тәулігіне 6 сағаттық толаскез алып, нәтижесінде жұмысты жоспарлы уақытта бітірмекші.  

Осы жылы бөлімше бойынша күшейтілген орташа жөндеу мен бағыттамалы бұрмаларды ауыстыру жұмыстары да жүргізілуде. Яғни Атырау жол дистанциясы бойынша Аққыстау, Мақат, Сағыз, Мұқыр, Кенбай, Жамансор станциялары аралығында барлығы 15,276 шақырым жолды орташа жөндеу белгіленген. Қазіргі уақытта оның басым бөлігі біткен.